Igbama ẹre Timoti ghaa khin vbe iko nọ rre Listra. Ovbi e Grik ẹre erhae ghaa khin, iyẹe na gha re Ovbi e Ju. Ke egbe ọvbokhan ẹre iyẹe ighẹ Yunis kevbe iyẹe nọkhua ighẹ Luis ya suẹn gha maa re emwi vbekpae Jehova.

Vbe ẹghẹ ne Pọl ya werriegbe mu okhian gha rrie Listra, ọ na do bẹghe ẹre wẹẹ, Timoti wa hoẹmwẹ etẹn kevbe wẹẹ ọ hoo nọ ru iyobọ ne iran. Ẹre Pọl na ghi wẹẹ ne Timoti lele irẹn gha mu okhian yo ẹvbo ughughan. Vbe ẹghẹ ne iran ya gha mu okhian yo ẹvbo ughughan, e Pọl keghi ru iyobọ ne Timoti, ne ọ ya gha re ọmwa nọ gbegba vbe ikporhu iyẹn nọ maan kevbe nọ sẹtin gha maa emwa emwi.

Orhiọn nọhuanrẹn ẹre ọ ghaa su e Pọl vbe Timoti vbe ehe ne iran rhirhi yo. Vbe Pọl ghi miẹn umian vbe asọn ọkpa, okpia ọkpa keghi tama e Pọl nọ gha die Masidonia ne ọ do ru iyobọ ne iran. Ẹre Pọl, Timoti, Sailas, kevbe Luk na gha rrie evba ya kporhu, iran na vbe mu iko nibun gbọ.

Emwa nibun keghi khian Ivbiotu e Kristi vbe ẹvbo ọkpa na tie ẹre Tẹsalonaika vbe Masidonia. Sokpan Ivbi e Ju eso na gha gbọvo e Pọl vbe emwa ne iran gba khian. Iran keghi tie iko ye iran uhunmwu. Usun emwa dan ni gbẹbu na ghi silo etẹn na gha rrie ehe ne emwa ni khaevbisẹ ye vbe ẹvbo nii, vbene iran na gha kha wẹẹ: ‘Eghian ọghe arriọba e Rom ẹre ikpia na khin!’ Ugbẹnvbe a miẹn wẹẹ arrọọ ọghe Pọl kevbe Timoti rre ikpadede, iran keghi lẹẹ gha rrie Beria vbe asọn.

Emwa ni rre Beria wa gha danmwehọ iyẹn nọ maan, rhunmwuda ọni, Ivbi e Grik kevbe Ivbi e Ju ni rre evba keghi khian Ivbiotu e Kristi. Sokpan vbe ẹghẹ ne Ivbi e Ju eso ni ke Tẹsalonaika rre ya suẹn gha ho ẹmwẹ, e Pọl keghi kpa gha rrie Atẹns. Timoti kevbe Sailas na ye gha rre Beria ne iran mieke na rhie igiọdu ne etẹn. Vbene ẹghẹ ya gha khian, e Pọl keghi gie Timoti werriegbe gha rrie Tẹsalonaika, ne ọ ya ru iyobọ ne etẹn ni rre evba rhunmwuda ukpokpo ne iran ghaa werriẹ aro daa. Vbe ọ ghi zẹ  kpẹẹ, e Pọl keghi gie Timoti gha rrie iko ughughan ne ọ ya rhie igiọdu ne iran.

E Pọl keghi tama e Timoti wẹẹ: ‘Emwa ni hoo ne iran ga e Jehova gha miẹn ukpokpo.’ E Timoti gele wa miẹn ukpokpo; a vbe muẹn ye eghan ba ẹmwẹ emwi ne ọ yayi. Irẹn keghi ghọghọ ye ẹkpotọ nọ kie ne irẹn, ne irẹn ya rhiẹre ma wẹẹ irẹn mwẹ ẹkoata dae Jehova.

E Pọl keghi tama etẹn ni rre Filipai wẹẹ: ‘I khian gie Timoti bu uwa gha dee. Ọ gha ru iyobọ ne uwa ya rẹn vbene uwa gha ya khian lele odẹ ọghe ẹmwata hẹ, ọ ghi vbe gie odẹ ughughan na ya kporhu ma uwa.’ E Pọl rẹnrẹn wẹẹ irẹn gha sẹtin hẹnhẹn egbe yan e Timoti. Ọwara ukpo nibun ẹre iran ya winna kugbe kevbe wẹẹ ọse kankankan ẹre iran ghaa khin.