Timothée a mbe ésoé mojañ ya akônda ya Lystres. Ésa wé a mbe mone Grec, nyia wé ki a mbe ngone Bejuif. Eunice, nyia wé, ba Loïs émvame jé, be nga taté na ba ye’ele Timothée mam a lat a Yéhôva, éyoñ a mbe a ngenane mongô.

Éyoñe Paul a nga ke jome bobejañ ya Lystres, a nga yene na Timothée a mbe a nyeke’e bobenyañe bé nya abuii, a na, a mbe a bili nkômbane ya volô be. Ane Paul a nga bañete Timothée na ba nye be lôte môs nsamba. Nté ôte ôse, Paul a mbe a yañele Timothée asu na a bo atyeñ ésaé nkañetane mbamba foé, a na, a bo ñye’ele a ne atyeñ.

Mbamba nsisim a mbe a liti’i Paul ba Timothée vôm be mbe be yiane ke. Alu éziñ, môt éziñ a nga jô Paul ñyenane na, a ke Macédoine asu na a ke volô wôé. Ane Paul, Timothée, Silas a Luc be nga ke kañete wôé; mvuse ya valé, mekônda me nga bialé.

Abui befam a binga ya Macédoine, tisone ya Thessalonique, e nga bo Bekristen. Ve Bejuif béziñ be nga bo Paul a bemvôé bé éviele. Ane be nga sulane nkunda bôt, a tindi be na be kee Paul a bemvôé bé be bejô bôt; be mbe be jô’ô na: ‘Bôte ba be ne besiñe be ngovina ya Rome!’ Éyoñe Paul ba Silas be nga yene na awu e nto be bebé, be nga tup alu ete, a ke Bérée.

Bôte ya Bérée be mbe ôjeja’a ya wô’ô mbamba foé, ja’a Bejuif a Begrek ya wôé be nga buni. Ve éyoñe Bejuif béziñ be mbe be so’o Thessalonique be nga soo zô’é a jo’ojo’o, Paul a nga ke Athenes. Timothée ba Silas be nga li’i Bérée asu na be ve bobejañ ngule nyul. Éyoñ éte nje Paul a nga lôme Timothée e Thessalonique na, a ke volô bobejañ ya wôé, amu be mbe be tôba’ane étibila’a.  Mvuse ya valé, Paul a nga beta lôme Timothée na a ke jome mekônda mevok, asu na a ke ve bobejañ ya wôé ngule nyul.

Paul a nga jô Timothée na: ‘Bôte ba kômbô bo Zambe ésaé ba ye tôban étibila’a.’ Timothée a nga tôbane fo’o étibila’a, a be nga futi nye nda mimbôk amu mbunane wé. Ve a mbe mevak, amu nalé a nga ve nye fane ya liti abim avé a kabetane Yéhôva.

Paul a nga jô Bephilippien na: ‘Ma lôme mia Timothée. A ye ye’ele mia avale mi ne wulu benya mejôô été, a ye fe yañele mia ésaé nkañete.’ Paul a mbe a yeme’e na, a mbe ve tabe Timothée ndi. Ba nye be nga saé nsamba, a be nga bo beta bemvôé abui mimbu.