Timote ti en zenn frer dan kongregasyon Lis. Son papa ti en Grek e son manman ti en Zwif. Son manman ti apel Enis e son granmanman Lois. Zot ti ansenny Timote lo Zeova depi ler i ti ankor ptipti.

Ler Pol ti vizit Lis dan son dezyenm vwayaz ki i ti fer pour anons sa bon nouvel, i ti remarke ki Timote ti vreman kontan bann frer ek ser e ki i ti vreman anvi ed zot. Pol ti envit Timote pour vin avek li pour fer sa vwayaz. Avek letan, Pol ti form Timote e ed li pour vin en bon predikater sa bon nouvel e en bon ansenyan.

Lespri sen ti gid Pol partou kot zot ti ale. En zour swar dan en vizyon, en zonm ti demann Pol pour vin Masedwann e ed zot. Alor Pol, Timote, Silas ek Lik ti al prese e form bann kongregasyon dan sa rezyon.

Dan Tesalonik, en lavil Masedwann, bokou zonm ek madanm ti vin Kretyen. Me serten Zwif ti zalou Pol ek son bann zanmi. Zot ti rasanble en lafoul ankoler e anmenn bann frer kot bann sef lavil. Zot ti kriye: ‘Sa bann zonm pe kas lalwa Sezar!’ Lavi Pol ek Timote ti an danze alor zot ti sove e al Bere pandan lannwit.

Bann dimoun Bere ti kontan pour tann sa bon nouvel. Bann Grek ek Zwif ti vin Kretyen laba. Me ler serten Zwif sorti Tesalonik ti arive, zot ti vin fer problenm e Pol ti al Atenn. Timote ek Silas ti reste Bere pour fortifye bann frer ek ser. Pli tar, Pol ti anvoy Timote Tesalonik pour ed bann frer ek ser fer fas avek bann gro persekisyon laba. Apre, Pol ti anvoy Timote pour al vizit e ankouraz bann frer ek ser dan bokou lezot kongregasyon.

 Pol ti dir Timote: ‘Bann ki anvi servi Zeova pou ganny persekite.’ Timote ti ganny persekite e met dan prizon akoz son lafwa. Menm ler i ti difisil, i ti kontan pour reste fidel avek Zeova.

Pol ti dir bann Filipyen: ‘Mon pe anvoy Timote kot zot. I pou ansenny zot ki savedir pour mars dan laverite e i pour ed zot dan predikasyon.’ Pol ti konnen ki i ti kapab depan lo Timote. Zot ti travay ansanm parey de bon zanmi pour plizyer lannen.