Fear óg ab ea Tiomóid a bhí sa bpobal i Liostra. Gréagach ab ea a athair, agus Giúdach ab ea a mháthair. Thosaigh Tiomóid ag foghlaim faoi Iehova óna mháthair, Eunaícé, agus óna sheanmháthair, Laoise, nuair a bhí sé an-óg.

Ar an dara turas go Liostra, thug Pól faoi deara go raibh an-chion ag Tiomóid ar na bráithre agus go raibh an-fhonn air cabhrú leo. Thug Pól cuireadh dó a dhul leis ag craobhscaoileadh. De réir a chéile, thraenáil sé Tiomóid chun an dea-scéal a chraobhscaoileadh agus a mhúineadh.

Threoraigh an spiorad naomh Pól agus Tiomóid pé áit a ndeachaigh siad. Bhí fís ag Pól oíche amháin, inar iarr fear air a theacht go dtí an Mhacadóin agus cabhrú leo. Mar sin, chuaigh Pól, Tiomóid, Síleas agus Lúcás go dtí an Mhacadóin chun an dea-scéal a chraobhscaoileadh agus chun pobail a bhunú.

I gcathair Teasaloinicé sa Macadóin d’iompaigh go leor fir agus mná ina gCríostaithe. Ach bhí cuid de na Giúdaigh in éad le Pól agus a chompánaigh. Chruinnigh siad slua le chéile agus rug siad ar na bráithre agus thug go dtí rialtóirí na cathrach iad, ag béicíl: ‘Tá na fir seo ag cur in aghaidh an rialtais Rómhánaigh!’ Bhí beatha Phóil agus Thiomóid i mbaol, mar sin theith siad go dtí Bearóia faoi dhorchadas na hoíche.

Bhí an-fhonn ar mhuintir na Bearóia foghlaim faoi Ríocht Dé, agus chreid Gréagaigh agus Giúdaigh araon an dea-scéal. Ach nuair a tháinig Giúdaigh ó Theasaloinicé agus a thosaigh siad ag tarraingt trioblóide, d’fhág Pól agus chuaigh sé go dtí an Aithin. D’fhan Tiomóid agus Síleas i mBearóia agus neartaigh siad na bráithre. In am tráth, chuir Pól Tiomóid ar ais go dtí Teasaloinicé chun cabhrú leis na bráithre déileáil leis an ngéarleanúint a bhí ag tarlú ansin. Níos déanaí, chuir Pól Tiomóid go dtí go leor pobail eile chun iad a spreagadh.

 Dúirt Pól le Tiomóid: ‘Gach duine atá ag iarraidh seirbhís a thabhairt d’Iehova, déanfar géarleanúint air.’ Déanadh géarleanúint ar Thiomóid agus cuireadh i bpríosún é mar gheall ar a chreideamh. Bhí sé sásta go bhfuair sé an deis a dhílseacht d’Iehova a léiriú.

Dúirt Pól leis na Filipigh: ‘Tá mé ag cur Tiomóid chugaibh. Múinfidh sé daoibh le maireachtáil de réir na Críostaíochta, agus taispeánfaidh sé daoibh leis an dea-scéal a chraobhscaoileadh.’ Bhí a fhios ag Pól go raibh sé in ann brath ar Thiomóid. D’oibrigh siad le chéile mar chairde agus mar shearbhóntaí Dé ar feadh blianta fada.