Eejachi wanee jimaʼai kanüliakai Timoteo, chejeʼewai nia Listra. Wayuu griego chi nüshikai otta wayuu judío tü niikat. Eunice sünülia tü niikat, Loida sünülia tü noushukot. Ekirajünüshi Timoteo joʼuuiwaʼaya nia nünain Jeʼwaa sutuma tü niikat otta tü noushukot.

Wanaa sümaa nuʼunuin Pablo Listramüin soʼu tü piantuakat nukua sünain aküjaa pütchi, niyaawata aaʼuchi Timoteo sünain alin nüpüla na anoujashiikana otta keeʼireein naaʼin nükaaliinjeein naya. Müshijeseʼe nuunejaanüin nutuma Pablo süpüla nümaainjachin nia. Ekirajünüshi mapa Timoteo nutuma Pablo süpüla nütüjain ekirajaa otta süpüla nütüjain aashajawaa süchiki nünüiki Maleiwa.

Oʼuninnüshi Pablo nümaa Timoteo nutuma chi naaʼinkai Maleiwa. Soʼu wanee ai, eeʼiyataashi wanee wayuu nümüin Pablo sünain maa: «Pülata Macedoniapünaa pükaaliinjaiwa waya». Nuʼunaka Pablo, Timoteo, Silas jee wanee anoujashii Macedoniamüin sünain aküjaa pütchi otta sukumajaka wanee jeketü outkajaalee.

Suluʼu tü pueulo kanüliakat Macedonia, chakat Tesalónica, wainma na wayuu ekerotokana sünain anoujaa. Eeshii waneinnua judío achunjaka nümüin Pablo otta na nümaajanakana. Nasakajaka wainma wayuu mojulaasü otta nantiraka na anoujashiikana nanainmüin na sülaülashiikana tü mmakat. «Wayuukana naa, neʼra amüinrü tü nuluwataakat anain César, chi aluwataaikai saaʼu Roma», namaka sümaa emetuluin nanüiki. Süka nuʼutuneein aaʼin Pablo nümaa Timoteo, naʼluwataaka aipaʼa Bereamüin.

Na wayuu chajanakana chaa Berea naapajeein maʼin tü pütchi anasü nüchikimaajatkat Maleiwa. Wainma wayuu griego otta wayuu judío ekerotokana sünain anoujaa soʼu tia. Eejana waneinnua judío antakana Tesalónicajee süpüla nashaʼwaleʼerüin naʼyataain na anoujashiikana. Nuʼunaka Pablo Atenasmüin. Akaisaʼa Timoteo nümaa Silas makatüshii naya Berea süpüla nakatchinrüin nanoula na nawalayuukana. Aluwataanüshi mapa Timoteo nüchikuaʼa Tesalónicamüin nutuma Pablo süpüla nükaaliinjain na anoujashii müliakana maʼin atumawaa.  Shiasaʼa mapa, nuluwataain Timoteo süpüla nuwaraijaain naaʼu na anoujashiikana otta nütütüleʼerüin naaʼin.

«Eʼrüinjana namüliala na aʼyataweekana nümüin Jeʼwaa», nümaka Pablo nümüin Timoteo. Müliashi atumawaa Timoteo otta püreesashi nia atumawaʼaya. Talatapejeʼe maʼin naaʼin Timoteo süka waneepiain nia nümaa Jeʼwaa.

«Taluwataainjachi Timoteo jünainmüin. Nikirajeena jia sünain tü shiimainkat otta nikirajeena jia süpüla jütüjain aküjaa pütchi», nümaka Pablo namüin na anoujashii chajanakana Filipos. Niʼitaain maʼin naaʼin Pablo nünain Timoteo. Kakalia naʼyataajiraain otta aleewajiraain maʼin naya.