Timoteus wa ri omurumendu omutanda ngwaa karere mombongo yaListra. Ihe wa ri Omugrike, nu ina wa ri Omujuda. Ina Eunike na ina omukurukaze wena Lois va honga Timoteus ohunga na Jehova ngunda e ri omuṱiṱi.

Indu Paulus tja karyanga koListra mouyenda we outjavari wokuzuvarisa, eye wa muna kutja Timoteus wa suverere ovakambure ovakwao nu wari nonḓero yokuvevatera. Paulus opa ningirira Timoteus kutja ve yende pamwe mouyenda we. Otja oruveze tjaaru kayenda, Paulus wa honga Timoteus okurira omuzuvarise nomuhonge omupyuke wombuze ombwa.

Ombepo ondjapuke ya vatera Paulus na Timoteus akuhe kaave i. Ouṱuku umwe, Paulus wa raerwa i omurumendu motjirimunikise kutja nge ye koMakedonie me ve vatere. Okutja Paulus na Silas na Timoteus na Lukas va ya pamwe ngo okukazuvarisa nokukavatera okuuta ombongo.

Ovarumendu novakazendu ovengi moTesalonika, otjihuro tjaMakedonie, va rira ovakambure. Posiya Ovajuda tjiva va ṱira Paulus novakwao eruru. Owo ve rikuta ongenga nu ave twara ovakambure mba kovanane votjihuro nave tja: ‘Ovarumendu mba ovanavita nohoromende yaRoma!’ Omiinyo vyaPaulus na Timoteus vya ri moumba, nowo otji va taurira koBerea mokati kouṱuku.

Ovature vaBerea va ri nonḓero yokuzuva ombuze ombwa, nu Ovagrike nOvajuda moBerea va rira ovakambure. Posiya indu Ovajuda tjiva tji ve ya okuza koTesalonika nave yekutjita onyungunyungu, Paulus wa ya koAtene. Timoteus na Silas va sewa moBerea okuyanḓiparisa ovakambure ovakwao. Otja oruveze tjaaru kayenda, Paulus wa hinda Timoteus okuyaruka koTesalonika okukavatera ovakambure ovakwao okutjinda omapirukiro omazeu tjinene ngaave munu ngo. Nu kombunda Paulus wa hinda Timoteus kutja ma karyangere ozombongo ozengi zarwe nokuzetunduuza.

 Paulus wa raera Timoteus na tja: ‘Imba mbu mave vanga okukarera Muhona mave tatumisiwa.’ Timoteus wa pirukirwa na tuwa mondeko mena rongamburiro ye. Eye wa ri nonyuṋe okumuna oruveze rwokuraisa ouṱakame we ku Jehova.

Paulus wa raera Ovafilipi na tja: ‘Ami me hindi Timoteus ku eṋe. Eye me mu hongo kutja okukayenda mouatjiri ku heya tjike nu me mu hongo okuungura otjiungura tjokuzuvarisa.’ Paulus aa tjiwa kutja ma yenene okuṱaṱera ku Timoteus. Owo aave ungura pamwe otjomapanga novakambure oure wozombura ozengi.