Ni Timoteo ket maysa nga agtutubo iti kongregasion iti Listra. Griego ti tatangna, ken Judio ti nanangna. Sipud kinaubingna, sinursuruan ni Eunice a nanangna ken ni Loida a lolana maipapan ken Jehova.

Iti maikadua a panagbibiahe ni Pablo tapno mangasaba, bimmisita idiay Listra. Nakitana a talaga nga ay-ayaten ni Timoteo dagiti kakabsat ken maragsakan a tumulong. Inawis ni Pablo ni Timoteo a makikadua iti panagbiahena. Sinanayna ni Timoteo nga agbalin a nalaing a mannursuro ken manangaskasaba iti naimbag a damag.

Indalan ti nasantuan nga espiritu da Pablo ken Timoteo sadinoman a napananda. Maysa a rabii, babaen iti sirmata, adda lalaki a nangawis ken Pablo a mapan idiay Macedonia tapno tumulong. Isu a napan sadiay da Pablo, Timoteo, Silas, ken Lucas tapno mangasaba ken mangbukel kadagiti kongregasion.

Adu ti nagbalin a Kristiano idiay Tesalonica a siudad ti Macedonia. Ngem nagimon ti dadduma a Judio kada Pablo. Nangummongda kadagiti dakes a lallaki ket inulodda dagiti kakabsat nga impan kadagiti agturay iti siudad, nga ipukpukkawda: ‘Kalaban ti gobierno ti Roma dagitoy a tattao!’ Karabiyanna, naglibas da Pablo ken Timoteo ket napanda idiay Berea ta agpelpeligro ti biagda.

Naragsakan dagiti taga-Berea a nakangngeg iti naimbag a damag ket adu a Griego ken Judio ti nagbalin a Kristiano sadiay. Ngem idi napan nanggulo ti dadduma a Judio a taga-Tesalonica, pimmanaw ni Pablo ket napan idiay Atenas. Nagbati da Timoteo ken Silas tapno paregtaenda dagiti kakabsat. Idi agangay, pinagsubli ni Pablo ni Timoteo idiay Tesalonica tapno tumulong kadagiti maidaddadanes  a kakabsat. Imbaonna met ni Timoteo a mangbisita iti dadduma pay a kongregasion tapno mangparegta.

Imbaga ni Pablo ken Timoteo: ‘Maidadanesto ti amin a mayat nga agserbi ken Jehova.’ Naidadanes ken naibalud ni Timoteo gapu iti pammatina ngem naragsakan ta babaen iti dayta, naipakitana nga isu ket matalek ken Jehova.

Imbaga ni Pablo kadagiti taga-Filipos: ‘Ibaonko kadakayo ni Timoteo. Isuronakayto no kasano ti agbiag kas adipen ni Jehova, ken sanayennakayo iti ministerio.’ Ammo ni Pablo a responsable ni Timoteo. Adu a tawen a nagkadkaduada a nagserbi ken imbilangda ti maysa ken maysa kas gayyem.