Timótiu éra un jóven di kongregason di Listra. Se pai éra gregu i se mai éra judeu. Se mai ki txomaba Eunisi, ku se avó Lóidi, inxina-l sobri Jeová désdi pikinoti.

Kantu Polu vizita Listra, duránti se sugundu viaji di pregason, el repara ma Timótiu ta amaba se irmons di korason i el ta krê djudaba es. Polu konvida Timótiu pa kunpanha-l na se viaji. Tudu kel ténpu ki es pasa djuntu, Polu trena Timótiu pa ser un bon pregador di notísias sábi.

Spritu santu orienta Polu ku Timótiu pa undi es bai. Un dia di noti, na un vizon, un ómi fla Polu pa pasa na Masedónia pa djuda-s. Nton Polu, Silas ku Lúkas bai prega la i es forma kongregasons.

Na Tesalónika, ki éra sidadi di Masedónia, txeu ómi ku mudjer bira ta sigi Jizus. Má alguns judeu tinha invéja di Polu ku se kunpanherus. Es djunta un monti di algen i es leba irmons pa governantis di sidadi i es grita: ‘Kes ómi li é inimigus di govérnu di Roma!’ Vida di Polu ku Timótiu staba na prigu, pur isu, duránti kel noti es fuji pa otu lugar ki txomaba Berea.

Gentis di Berea staba ku vontadi di obi notísias sábi i tantu gregus ku judeus pasa ta ten fé na Jizus. Má kantu alguns judeu bai Tesalónika i es ranja prubléma, Polu viaja pa Atenas. Timótiu ku Silas fika na Berea ta da irmons koraji. Ku ténpu, Polu manda Timótiu otu bês pa Tesalónika, pa djuda irmons lida ku pirsigison fórti ki staba la. Dipôs, Polu manda Timótiu pa bai vizita otus kongregason i pa da-s koraji.

 Polu fla Timótiu: ‘Tudu algen ki ta sirbi Jeová ta ser pirsigidu.’ Timótiu pirsigidu i el podu na kadiâ pamodi se fé. El staba kontenti ku xansi di mostra se lialdadi pa Jeová.

Polu fla irmons di Filipus: ‘N sta manda nhos Timótiu. El ta bai inxina nhos modi ki nhos pode sirbi Jeová i el ta trena nhos pa pregason.’ Polu sabia ma el pode kunfiaba na Timótiu. Pa txeu ténpu, es sirbi Jeová djuntu sima dôs amigu.