Timotheo aarĩ mũrũ wa Ithe witũ mũnini kĩũngano-inĩ kĩa Lusitera. Ithe aarĩ Mũngiriki na nyina aarĩ Mũyahudi. Mami wao Eunike na cũwe Loisi, nĩ maamũrutire ũhoro wa Jehova kuuma arĩ o kaana kanini.

Rĩrĩa Paulo aathiĩte Lusitera rũgendo-inĩ rwake rwa kerĩ rwa kũhunjia, nĩ onire atĩ Timotheo nĩ eendete ariũ a Ithe witũ na nĩ eeriragĩria kũmateithia. Paulo nĩ oririe Timotheo mathiage nake ng’endo ciake cia kũhunjia. Nĩ aamenyeririe Timotheo kwa ihinda nĩguo atuĩke mũhunjia mwega na mũrutani wa ũhoro ũrĩa mwega.

Paulo na Timotheo nĩ maatongoragio nĩ roho mũtheru kũrĩa guothe maathiaga. Ũtukũ ũmwe, Paulo nĩ eerirũo nĩ mũndũ ũmwe kũgerera kĩoneki athiĩ Makedonia akamateithie. Nĩ ũndũ ũcio, Paulo, Timotheo, Sila, na Luka nĩ maathiire kuo kũhunjia na kwambĩrĩria ciũngano.

Athuri na atumia aingĩ itũũra-inĩ rĩa Thesalonike rĩrĩa rĩarĩ Makedonia nĩ maatuĩkire Akristiano. No Ayahudi amwe nĩ maarĩ na ũiru mũno kwerekera Paulo na arĩa maahunjagia nake. Maacokanĩrĩirie kĩrĩndĩ na magĩkururia ariũ a Ithe witũ kũrĩ anene a itũũra, makiugaga ũũ: ‘Andũ aya nĩ thũ cia thirikari ya Roma!’ Tondũ Paulo na Timotheo maarĩ ũgwati-inĩ, nĩ morire magĩthiĩ Beroia ũtukũ.

Andũ a Beroia nĩ maarĩ na wendi mũnene wa kwĩruta ũhoro ũrĩa mwega, na Angiriki na Ayahudi arĩa maaikaraga kuo nĩ maatuĩkire etĩkia. No rĩrĩa Ayahudi amwe mookire kuuma Thesalonike na makĩambĩrĩria ngũĩ, Paulo nĩ aathiire Athene. Timotheo na Sila nĩ maaikarire Beroia nĩguo mekĩre ariũ a Ithe witũ hinya. Thutha wa ihinda, Paulo nĩ aatũmire Timotheo Thesalonike nĩguo agateithie ariũ a Ithe witũ mahote kũhiũrania na mĩnyamaro mĩnene ĩrĩa  maacemanagia nayo. Thutha ũcio, nĩ aatũmire Timotheo agaceerere ciũngano ingĩ nyingĩ agĩciĩkĩraga ngoro.

Paulo eerire Timotheo ũũ: ‘Arĩa othe mendaga gũtungatĩra Jehova nĩ marĩnyariragwo.’ Timotheo nĩ aanyaririrũo na akĩohwo njera nĩ ũndũ wa wĩtĩkio wake. Nĩ aakenire nĩ ũndũ wa mweke ũrĩa aarĩ naguo wa kuonania wĩhokeku wake harĩ Jehova.

Paulo nĩ eerire ariũ a ithe witũ a Filipi ũũ: ‘Ngũmũtũmĩra Timotheo. Nĩ ekũmũruta gũthiĩ na njĩra ya ũhoro ũrĩa wa ma nĩ kuuga atĩa, na amũmenyerie ũtungata-inĩ.’ Paulo nĩ eehokete Timotheo. Nĩ maarutithanirie wĩra kwa ihinda iraya marĩ arata na marĩ ndungata cia Ngai.