တၢ်မၤလိ ၁၀၀
စီၤပီလူးဒီးစီၤတံၤမသ့း
စီၤတံၤမသ့းမ့ၢ် ဒီပုၢ်ဝဲၢ်သးစၢ်တဂၤလၢ ဝ့ၢ်လူစတြၤ အတၢ်အိၣ်ဖှိၣ်အပူၤလီၤ. စီၤတံၤမသ့းအပၢ်န့ၣ် မ့ၢ်ပှၤကြံးဖိ ဒီးအမိၢ်န့ၣ်မ့ၢ်ပှၤယူဒၤဖိလီၤ. ဖဲစီၤတံၤမသ့း အနီၢ်ဆံးဒံးအခါ အမိၢ်နီၢ်အူၤနံက့ၤ ဒီးအဖံနီၢ်လိၤအ့ၣ် သိၣ်လိအီၤဘၣ်ဃးဒီး ယဟိဝၤယွၤအဂ့ၢ်လီၤ.
ဖဲစီၤပီလူးဟဲအိၣ်သကိးဝ့ၢ်လူစတြၤအခါ အဝဲထံၣ်ဘၣ်ဝဲလၢစီၤတံၤမသ့း အဲၣ်အဒီပုၢ်ဝဲၢ်တဖၣ်နီၢ်ကီၢ် ဒီးသးဆူၣ်လၢကမၤစၢၤအဝဲသ့ၣ်န့ၣ်လီၤ. အဃိ စီၤပီလူးကွဲမုာ်စီၤတံၤမသ့း လၢအကလဲၤသကိးတၢ်ဒီးအီၤလီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး စီၤပီလူးသိၣ်လိစီၤတံၤမသ့းလၢ အကကဲထီၣ်ပှၤစံၣ်တဲၤတဲလီၤတၢ်ဖိလၢအဂ့ၤတဂၤအဂီၢ်လီၤ.
ဖဲစီၤပီလူးဒီးစီၤတံၤမသ့းလဲၤတၢ် တပူၤလၢ်လၢ်အခါ သးစီဆှံဟံးစုနဲၣ်ကျဲအဝဲသ့ၣ်လီၤ. ဘၣ်တနၤ လၢတၢ်ထံၣ်လၢညါခီအပူၤန့ၣ် ပိာ်ခွါတဂၤတဲဘၣ်စီၤပီလူးလၢ ဟဲဆူမၤက့းဒနံ ဒီးမၤစၢၤပှၤအိၣ်ဖဲန့ၣ်တဖၣ်တက့ၢ်. အဃိ စီၤပီလူး, စီၤတံၤမသ့း, စီၤစံလၤ ဒီးစီၤလူၤကၣ် လဲၤဝဲဖဲန့ၣ်ဒ်သိး ကစံၣ်တဲၤတဲလီၤတၢ် ဒီးဒုးအိၣ်ထီၣ်ဝဲ တၢ်အိၣ်ဖှိၣ်တဖၣ်အဂီၢ်လီၤ.
ဝ့ၢ်သ့းစၤလနံန့ၣ် အိၣ်လၢမၤက့းဒနံအပူၤလီၤ. ဖဲန့ၣ်န့ၣ် ပိာ်မုၣ်ဒီးပိာ်ခွါအါဂၤ ကဲထီၣ်ခရံာ်ဖိတဖၣ်လီၤ. ဘၣ်ဆၣ် ပှၤယူဒၤဖိတနီၤန့ၣ် သးက့ၣ်ဝဲစီၤပီလူးဒီး ပှၤလၢအမၤသကိးတၢ်ဒီးအီၤတဖၣ်လီၤ. အဝဲသ့ၣ်တဲအၢတဲသီ စီၤပီလူးဒီးအသကိးတဖၣ်ဒီး လဲၤတွံၢ်ဝဲဆူပဒိၣ်အအိၣ် ဒီးကိးပသူထီၣ်လၢ– ‘ပိာ်ခွါတဖၣ်အံၤ မ့ၢ်ပှၤရိမ့ၤအပဒိၣ် အဒုၣ်အဒါလီၤ.’ စီၤပီလူးဒီးစီၤတံၤမသ့း အတၢ်အိၣ်မူလီၤဘၣ်ယိၣ်ဝဲအဃိ ဖဲမုၢ်နၤခီန့ၣ် အဝဲသ့ၣ်လဲၤဃ့ၢ်ဝဲလၢ ဝ့ၢ်ဘ့းရံၤလီၤ.
ပှၤအိၣ်လၢဝ့ၢ်ဘ့းရံၤအပူၤန့ၣ် အသူၣ်ဆူၣ်သးဆူၣ်လၢ ကမၤလိဝဲကစၢ်ယွၤ အကလုၢ်ကထါလီၤ. ပှၤကြံးဖိ ဒီးပှၤယူဒၤဖိ လၢအအိၣ်ဖဲန့ၣ်တဖၣ်န့ၣ် ကဲထီၣ်ဝဲခရံာ်ဖိလီၤ. ဘၣ်ဆၣ် ပှၤယူဒၤဖိတနီၤ လၢအအိၣ်လၢသ့းစၤလနံအပူၤန့ၣ် ဟဲဒုးအိၣ်ထီၣ်ဝဲတၢ်ကီတၢ်ခဲအဃိ စီၤပီလူးလဲၤဝဲလၢဝ့ၢ်အၤသ့ၣ်လီၤ. မ့မ့ၢ်စီၤတံၤမသ့းဒီးစီၤစံလၤန့ၣ် အိၣ်တ့ၢ်ဝဲလၢဝ့ၢ်ဘ့းရံၤ ဒ်သိးကဒုးဆူၣ်ထီၣ် ဒီပုၢ်ဝဲၢ်တဖၣ်အဂံၢ်အဘါအဂီၢ်လီၤ. လၢခံ စီၤပီလူးဆှၢက့ၤစီၤတံၤမသ့းလၢ သ့းစၤလနံအပူၤ လၢကမၤစၢၤဒီပုၢ်ဝဲၢ်တဖၣ် လၢအထံၣ်ဘၣ် တၢ်မၤအၢမၤနးန့ၣ်လီၤ. ဝံၤဒီး စီၤပီလူးဆှၢလီၤစီၤတံၤမသ့းလၢ ကလဲၤအိၣ်သကိးဝဲ တၢ်အိၣ်ဖှိၣ်အါဖျၢၣ် ဒ်သိး ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်အဂီၢ်လီၤ.
စီၤပီလူးတဲဘၣ် စီၤတံၤမသ့းလၢ– ‘ပှၤလၢအဲၣ်ဒိးမၤယဟိဝၤယွၤ အတၢ်မၤန့ၣ် ကဘၣ်တၢ်မၤအၢမၤသီအဝဲသ့ၣ်လီၤ.’ ပှၤမၤအၢမၤသီ စီၤတံၤမသ့း ဒီးခီဖျိလၢအတၢ်နာ်အဃိ အဝဲဘၣ်လဲၤအိၣ်လၢဃိာ်ပူၤလီၤ. ဘၣ်ဆၣ် စီၤတံၤမသ့းသးခုမ့ၢ်လၢ အဝဲဒိးန့ၢ်ဘၣ်တၢ်ခွဲးတၢ်ယာ်လၢ ကပာ်ဖျါထီၣ်ဘၣ် အတၢ်သးတီလၢ ယဟိဝၤယွၤအဖီခိၣ်န့ၣ်လီၤ.
စီၤပီလူးတဲဘၣ် ပှၤဖံလံးပံၤဖိတဖၣ်လၢ– ‘ယကဆှၢလီၤန့ၢ်သု စီၤတံၤမသ့းလီၤ. အဝဲကသိၣ်လိသီလိသုဒ်သိး သုကမၤထွဲတၢ်မ့ၢ်တၢ်တီ ဒီးအကသိၣ်လိသုလၢ သုစံၣ်တဲၤတဲလီၤတၢ်ကသ့ဂ့ၤဂ့ၤအဂီၢ်လီၤ.’ စီၤပီလူးသ့ၣ်ညါဝဲလၢ အနာ်န့ၢ်စီၤတံၤမသ့းသ့ဝဲလီၤ. အဝဲသ့ၣ်မၤသကိးတၢ်လၢ အနံၣ်အါမးအတီၢ်ပူၤဒီး ကဲထီၣ်ဘၣ်တံၤသကိးတံၢ်နီၢ်လီၤ.
“ပှၤလၢအသး ဒ်သိးဒီးအီၤ, လၢအကအံးကကွၢ်သု ဒ်အဝဲဒၣ်အသိးန့ၣ် တအိၣ်ဘၣ်ဒီးယၤနီတဂၤဘၣ်. အဂ့ၢ်ဒ်အံၤ, ပှၤခဲလၢာ်ဃု အတၢ်ဒၣ်ဝဲဒီး တမ့ၢ်ဘၣ်ယ့ၣ်ၡူးခရံာ်အတၢ်ဘၣ်.”—ဖံလံးပံၤ ၂:၂၀, ၂၁
တၢ်ဂ့ၤအဂၤလၢ နကဘၣ်သး
သိၣ်လိနဖိတဖၣ် တက့ၢ်
စီၤတံၤမသ့း အဲၣ်ဒိးမၤစၢၤပှၤဂၤ
နအိၣ်ဒီးတၢ်အိၣ်မူလၢ အပှဲၤဒီးတၢ်သူၣ်ခုသးခု ဒ်စီၤတံၤမသ့းအသိး ကသ့ဒ်လဲၣ်.
