TUTO 100
Paulusi ni Timotea
Timotea neli muzwale wa mukulwani mwa Puteho ya Listra. Ndatahe neli Mugerike, mi mahe neli Mujuda. Mahe, yena Eunise, ni bo kukwaa hae babasali bo Loisi neba mulutile ka za Jehova inze asali mwanana.
Paulusi hanaapotezi puteho ya kwa Listra mwa musipili wahae wabubeli wa kukutaza, alemuha kuli Timotea naalata hahulu mizwale bahae ni kuli naatabela kubatusa. Paulusi akupa Timotea kuli azamaye ni yena mwa musipili wahae. Hamulaho wa nako, Paulusi aluta Timotea kuba mukutazi ni muluti yomunde wa taba yende.
Moya okenile neuetelela Paulusi ni Timotea kone baya kaufela. Zazi leliñwi busihu, muuna yomuñwi abulelela Paulusi mwa pono kuli aye kwa Masedonia kuli ayo batusa. Kacwalo, Paulusi, Timotea, Silasi, ni Luka baya kwa Masedonia kuyo kutaza mi batoma liputeho zenca.
Mwa tolopo ya Tesalonika ya mwa Masedonia, baana ni basali babañata baba Bakreste. Kono Majuda babañwi nebautwela muna Paulusi ni balikani bahae. Baonga-onga ñumbili mi baisa mizwale bao kwa baeteleli ba tolopo, inze bahuwa kuli: ‘Batu ba balwanisa mulonga wa Roma!’ Bupilo bwa Paulusi ni Timotea nebuinzi mwa lubeta, kacwalo basabela kwa Berea ka nako ya busihu.
Batu ba mwa Berea nebatabela kuituta taba yende, mi Magerike ni Majuda bane pila mwateñi baba balumeli. Kono Majuda babañwi hane batile kuzwa Tesalonika kuto kukueza twaniso, Paulusi aya kwa Atene. Timotea ni Silasi baina mwa Berea kuli batiise mizwale. Hamulaho wa nako, Paulusi aluma Timotea kukutela kwa Tesalonika kuli ayo tusa mizwale kutiyela nyandiso yetuna yeneli teñi. Hasamulaho, Paulusi aluma Timotea kupotela liputeho zeñwi zeñata ni kususueza mizwale ni likaizeli.
Paulusi ali ku Timotea: ‘Bababata kusebeleza Jehova bakanyandiswa.’ Timotea naanyandisizwe ni kutamiwa mwa tolongo kabakala tumelo yahae. Naatabile kabakala kubonisa busepahali bwahae ku Jehova.
Paulusi naabulelezi Mafilipi kuli: ‘Nimilumela Timotea. Uka miluta zekutalusa kuzamaya mwa niti, mi uka miluta mwakukutaleza hande mwa bukombwa.’ Paulusi naaziba kuli naakona kuitinga ku Timotea. Nebasebelize hamoho sina balikani ka lilimo zeñata.
“Hanina yomuñwi yanani moya oswana ni wahae yakatokomela zamina ka pilu yahae kaufela. Kakuli babañwi kaufela baipatela zabona feela, isiñi za Jesu Kreste.”—Mafilipi 2:20, 21
Hape Mwendi Mwakona Kutabela Litaba Ze
MU LUTE BANA BA MINA
Timotea Naa Bata ku Tusa Batu
Mu kona ku ikola cwañi bupilo bo bunde hahulu sina Timotea?
TAWALA YA MULIBELELI
‘Mwanaka ya Latwa ni ya Sepahala ku Mulena’
Kiñi Zenetusize Timotea Kutuhela kuba ni Maswabi ni Kuba Muokameli wa Sikreste?
