Temote i tutu umo nkasampe wādi mu kipwilo kya Lesetala. Shandi wādi Mungidiki, inandi nandi wādi Muyuda. Inandi Yunisa ne nkambo wandi Loisa, bāfundije Temote myanda ya Yehova tamba ku bwanuke.

Polo pākapempwile kipwilo kya Lesetala mu lwendo lwandi lwa bubidi lwa busapudi, wājingulwile amba Temote usenswe banababo bininge kadi usakanga kwibakwasha. Polo wāityile Temote ende nandi mu lwendo lwandi. Mwenda mafuku, Polo wāfundije Temote ekale mufundiji ne musapudi mulumbuluke wa myanda miyampe.

Mushipiditu ujila wādi uludika ba Polo ne Temote konso kobādi benda. Difuku dimo bufuku, muntu umo wāityile Polo mu kimonwa āye ku Masedonya ebakwashe. Penepo ba Polo, Temote, Shilasa, ne Luka bāenda’ko kukasapula ne kushimika’ko bipwilo.

Mu Tesalonika, kibundi kya bene Masedonya, bantu bavule bana-balume ne bana-bakaji, bāikele ke bene Kidishitu. Inoko Bayuda bamo bākwatyilwe Polo ne balunda nandi mukao. Bāsoñanya kibumbo kyātwala bano banabetu ku baludiki, kēbela mabila’mba: ‘Bano bantu i balwana na bulopwe bwa bene Loma!’ Būmi bwa Polo ne bwa Temote byobwādi mu kyaka, o mwanda bānyemēne ku Belea bufuku.

Bantu ba mu Belea bādi na mutyima wa kusaka kuyuka myanda miyampe, kadi Bangidiki ne Bayuda ba mu Belea bāitabije. Inoko Bayuda bamo bātambile ku Tesalonika mwanda wa kwiya kuleta kavutakanya, Polo wānyemena ku Atene. Ba Temote ne Shilasa, bāshele mu Belea mwanda wa kukomeja banababo. Mwenda mafuku, Polo wātumine Temote akajokele ku Tesalonika mwanda wa kukakwasha’ko banababo bādi balwa na kupangwapangwa kukatampe. Kupwa, Polo  wātuma Temote akapempule bipwilo bikwabo bivule mwanda wa kwibikankamika.

Polo wāsapwidile Temote amba: ‘Boba basaka kwingidila Yehova bakapangwapangwa.’ Temote wāpangilwepangilwe ne kukutwa pa mwanda wa lwitabijo lwandi. Wādi na nsangaji pa uno mukenga waādi nao wa kulombola’mba ulamete kudi Yehova.

Polo wāsapwidile bene Fidipai amba: ‘Nemutumina Temote. Usa kwimufundija mushintulwila kunangila mu bubine, kadi usa kwimufundija mwa kusapwila.’ Polo wādi ukulupile Temote. Bādi bengindi bengidila pamo bu balunda mu bula bwa myaka mivule.