DILONGESHA DIA 100
Paulo ne Timote
Timote uvua nsonga muena Kristo mu tshisumbu tshia ku Luseta. Tatuende uvua muena Greke, mamuende muena Yuda. Mamuende Eunike ne kakuende muntu mukaji Loyi bavua bamulongeshe malu a Yehowa katshia ku buana buende.
Pavua Paulo muye ku Luseta mu luendu luende luibidi lua diyisha wakamona ne: Timote uvua munange bena Kristo nende bikole ne uvua ne muoyo wa kubambuluisha. Paulo wakalomba Timote bua kumufila mu luendu luende alu. Mu bungi bua matuku, Paulo wakalongesha Timote bua kuikala uyisha lumu luimpe bimpe ne ululongesha kabidi bimpe.
Nyuma muimpe uvua ulombola Paulo ne Timote miaba yonso ivuabu baya. Dituku dikuabu butuku, muntu mukuabu wakambila Paulo mu tshikena kumona bua kuya ku Makedonia bua kubambuluisha. Ke Paulo, Timote, Sila, ne Luka kuyabu kuntu aku bua kuyisha ne kuenza bisumbu.
Bantu ba bungi, balume ne bakaji, bakalua bena Kristo mu tshimenga tshia Tesalonike tshia mu Makedonia. Kadi bena Yuda bakuabu bakumvuila Paulo ne bena diende mukawu. Kusangishabu musumba wa bena tshimvundu, kukokabu bana betu bena Kristo kuyabu nabu kudi bakokeshi ba tshimenga bela mbila bamba ne: ‘Bantu aba mbaluishi ba mbulamatadi wa Lomo!’ Paulo ne Timote bavua mu njiwu, ke bualu kayi bakanyemena ku Beloya butuku butuku.
Bantu ba mu Beloya bavua ne muoyo wa kumanya lumu luimpe, nunku bena Greke ne bena Yuda ba bungi ba mu Beloya amu bakalua bena kuitabuja. Kadi pavua bena Yuda bakuabu ba ku Tesalonike balue kujula tshimvundu, Paulo wakumbuka, kuyaye ku Atena. Timote ne Sila bakashala bobu mu Beloya bua kukolesha bena Kristo nabu. Pakapita matuku, Paulo wakapingaja Timote ku Tesalonike bua kuambuluisha bena Kristo ba kuntu aku bua kumanyabu mua kutantamena dikengeshibua dikole divuabu nadi. Pashishe Paulo wakatuma Timote bua kuya kutangila bisumbu bikuabu bua kubikankamija.
Paulo wakambila Timote ne: ‘Bantu badi basue kuenzela Yehowa mudimu nebakengeshibue.’ Timote wakakengeshibua bua ditabuja diende, kumuelabu too ne mu buloko. Uvua musanke bua muvuaye mupete mpunga au bua kuleja muvuaye mulamate Yehowa.
Paulo wakambila bena Filipoyi ne: ‘Ndi nnutumina Timote. Neanulongeshe tshidi kuendela mu bulelela kumvuija ne kabidi mua kuyisha bimpe.’ Paulo uvua mumanye ne: uvua mua kueyemena Timote. Bavua benze mudimu pamue bidimu bia bungi bu balunda ne benzejanganyi ba mudimu.
“Tshiena ne muntu mukuabu udi ne lungenyi bu luende udi mua kuditatshisha bua malu anudi nawu ne muoyo mujima to. Bualu bakuabu bonso badi badikebela malu abu, ki nga Yezu Kristo to.”—Filipoyi 2:20, 21
Mona bikuabu:
ULONGESHE BANA BEBE
Timote uvua musue kuambuluisha bantu
Mmushindu kayi uudi mua kuikala ne nsombelu muimpe ne wa disanka bu Timote?
TSHIBUMBA TSHIA NSENTEDI
Timote—‘Muananyi munanga udi ne lulamatu mu Mukalenge’
Ntshinyi tshivua tshiambuluishe Timote bua kumbusha bundu ne mukulu muena Krito wa tshitembu?
