Timotewu wadiña manakwetu wakansi muchipompelu chakuLisitira. Tata yindi wadiña kaGiriki, nawa mama yindi wadiña kaYudeya. Mama yaTimotewu, Yunisi nankaaka yindi Lowisi amudizishileña Timotewu chalala hadi Yehova kufuma tuhu kuwansi windi.

Pawulu chayiliyi kuLisitira halwendu lwindi lwamuchiyedi lwakushimwina, wamweni nindi Timotewu wakeñeli nankashi amanakwetu nawa wafwilileña kuyikwasha. Pawulu wamulejeli nindi ayi nindi hamu. Mukuhita kwampinji, Pawulu wamudizishili Timotewu kwikala mukakushimwina wamuwahi nawa ntañishi wansañu yayiwahi.

Spiritu yajila yayilombweleña aPawulu naTimotewu kwejima kwayileñawu. Ifuku dimu nawufuku, iyala wumu wamulejeli Pawulu muchimwenu nindi ayi kuMasidoniya nakuyikwasha. Dichi Pawulu, Timotewu, Silasi niLuka ayili kwenoku nakushimwina nikutuña yipompelu.

Mumusumba waMasidoniya wamuTesalonika, amayala amavulu niambanda ekalili akaKristu. Ilaña aYudeya amakwawu amutiyilileña Pawulu ichima niamabwambu jindi. Ayinyeñumukili kudi izanvu dawakamadombu nawa amanakwetu ayikokañesheli nakuyitwala kudi anyuuli amumusumba, iku anakubidika nawu: ‘Awa amayala hiyayilumbu janfulumendi yaRoma!’ Wumi waPawulu niwaTimotewu wadiña muwubanji, dichi atemukilili kuBereya nawufuku.

Antu amuBereya akeñeleña nankashi kwiluka nsañu yayiwahi, dichi aGiriki niaYudeya adiña mwenimu etiyili. Ilaña chelili aYudeya amakwawu enzi kufuma kuTesalonika nakuleta kukala, Pawulu wafuminiku nakuya kuAtenisi. ATimotewu naSilasi ashalili muBereya nakukolesha amanakwetu. Haniyi mpinji, Pawulu wamutemesheli Timotewu nindi afunti kuTesalonika nakukwasha amanakwetu amweneña  ikabisha dasweja kwenoku. Mukuhita kwampinji, Pawulu wamutemesheli Timotewu kuya nakwendela yipompelu yikwawu yayivulu nakuyikolesha.

Pawulu wamulejeli Timotewu nindi: ‘Ejima akeñaña kumukalakela Yehova akayikabisha.’ Timotewu amukabishili nawa amukasili muloña wachikuhwelelu chindi. Muniku kukala kwejima kwamweniyi, watiyili kuwaha hakumwekesha nindi washinshika kudi Yehova.

Pawulu walejeli aFwilipi nindi: ‘Inakuyitemeshela Timotewu. Wakayidizisha muchatalisha kwenda muchalala, nawa wakayidizisha nichakushimwina.’ Pawulu welukili nindi watela kumushindamena Timotewu. Hadi yaaka yayivulu aPawulu naTimotewu adiña amabwambu nawa azatilileña hamu.