Dan kongregasion List, ti ena enn zenn frer ki ti apel Timote. So papa ti enn Grek ek so mama ti enn Zwif. So mama ti apel Enis, ek so granmer Lois. Depi ki Timote ti tipti, zot ti ansegn li lor Zeova.

Kan Pol ti vizit List pandan so deziem vwayaz misioner, li ti remarke ki Timote ti vremem kontan bann frer ek ki li ti vremem anvi ed zot. Pol ti invit Timote pou akonpagn li dan so vwayaz. Tigit par tigit, Pol ti form Timote pou vinn enn bon ansegnan ek enn bon predikater bonn nouvel.

Lespri sin ti gid Pol ek Timote partou kot zot ti ale. Enn aswar, dan enn vizion, enn misie ti dir Pol vinn Masedwann pou ed zot. Alor, Pol, Timote, Silas, ek Lik ti al laba pou prese ek pou form bann kongregasion.

Dan Tesalonik, enn lavil dan Masedwann, boukou dimounn ti vinn Kretien. Me sertin Zwif ti zalou Pol ek so bann kamarad. Zot ti rasanble enn lafoul ek zot ti amenn bann frer devan bann sef lavil, ek zot ti kriye: ‘Sa bann zom-la, zot bann lennmi gouvernman Romin!’ Lavi Pol ek Timote ti an danze. Alor, pandan lanwit, zot ti sove ek zot ti al dan lavil Bere.

Bann abitan Bere ti bien kontan tann koz lor bonn nouvel, ek boukou Grek ek Zwif ti vinn Kretien. Me sertin Zwif, ki ti sorti Tesalonik, ti vinn met dezord dan Bere. Lerla, Pol ti al Atenn. Timote ek Silas ti res dan Bere pou fortifie bann frer ek ser. Plitar, Pol ti avoy Timote dan Tesalonik pou ed bann frer ek ser ki ti pe gagn bann gran persekision. Apre sa, Pol ti fer Timote vizit plizir lezot kongregasion pou ankouraz bann frer ek ser.

 Pol ti dir Timote: ‘Bann ki anvi servi Zeova pou gagn persekision.’ Timote ti gagn persekision ek li ti al dan prizon akoz so lafwa. Me li ti ere, parski li ti gagn lokazion montre so fidelite anver Zeova.

Pol ti dir bann abitan lavil Filip: ‘Mo pe avoy Timote kot zot. Li pou montre zot ki vedir mars dan laverite, ek li pou form zot dan predikasion.’ Pol ti kone ki li ti kapav kont lor Timote. Zot ti bann bon kamarad ek zot ti servi Zeova ansam pandan plizir lane.