Ta̱ Timoteo iin ta̱ loʼo ta̱ ni̱xi̱yo congregación ñuu Listra xi̱kuura. Ta̱ ñuu Grecia xi̱kuu yivára, ta siʼíra ñá ñuu Judá xi̱kuuñá. Siʼíra xi̱naní Eunice, ta nána xi̱tánra xi̱naní Loida. Náyóʼo sa̱náʼa̱ná ta̱ Timoteo xa̱ʼa Jehová tá loʼora.

Tá ni̱xa̱a̱ ta̱ Pablo ñuu Listra ña̱ yichi̱ u̱vi̱, xi̱nira ña̱ kúʼvi̱ní-ini ta̱ Timoteo xínira na̱ hermano ta chíndeérana. Xa̱ʼa ña̱yóʼo, ta̱ Pablo ni̱ka̱ʼa̱nra xíʼin ta̱ Timoteo ña̱ ku̱ʼu̱nra xíʼinra inkaka ñuu natúʼunna xa̱ʼa Ndióxi̱. Ni̱ya̱ʼa tiempo, ta̱ Pablo va̱ʼaní chi̱ndeéra ta̱ Timoteo ña̱ va̱ʼa sanáʼa̱ra na̱ yiví xa̱ʼa Ndióxi̱.

Espíritu Ndióxi̱ chi̱ndeé ta̱ Pablo xíʼin ta̱ Timoteo nu̱ú ni̱xi̱kana. Iin ñu̱ú, ta̱ Pablo ni̱tu̱vi nu̱úra xi̱nira iin ña̱ʼa. Xi̱nira iin ta̱ ni̱ka̱ʼa̱n ná ku̱ʼu̱nra ñuu Babilonia chindeérana. Ta̱ Pablo, ta̱ Timoteo, ta̱ Silas xíʼin ta̱ Lucas ku̱a̱ʼa̱nna natúʼunna xa̱ʼa Ndióxi̱ ñuu kán, ta ku̱a̱ʼání congregación ki̱xaʼá íyo.

Ña̱ ñuu Tesalónica, ku̱a̱ʼání na̱ ta̱a xíʼin ná si̱ʼí ndu̱una na̱ discípulo ta̱ Jesús. Soo sava na̱ judío kǒo kúni̱na ta̱ Pablo xíʼin na̱ xíka xíʼinra. Nda̱kutáʼan ku̱a̱ʼání na̱ yiví ti̱inna ta̱ Pablo xíʼin na̱ kítáʼan xíʼinra ku̱a̱ʼa̱nna nu̱ú na̱ chíñu, ta ni̱ka̱ʼa̱nna: “Na̱ ta̱a yóʼo contra kúúna xíʼin na̱ chíñu ñuu Roma”. Kúni̱na kaʼnína ta̱ Pablo xíʼin ta̱ Timoteo, ta míí ñu̱ú saá ku̱a̱ʼa̱nna ñuu Berea.

Na̱ ñuu Berea kúni̱na sakuaʼana xa̱ʼa Ndióxi̱, ta ku̱a̱ʼání na̱ ñuu Grecia xíʼin na̱ judío ka̱ndíxana ta̱ Jesús. Soo sava na̱ judío na̱ ke̱e ñuu Tesalónica va̱ása kúni̱na ka̱ʼa̱n ta̱ Pablo xa̱ʼa ta̱ Jesús. Ta ta̱ Pablo ku̱a̱ʼa̱nra chí ñuu Atenas. Ta̱ Timoteo xíʼin ta̱ Silas ki̱ndoona ñuu Berea ña̱ chindeéna na̱ íyo kán. Ni̱ya̱ʼa loʼo tiempo, ta̱ Pablo tuku chi̱ndaʼára ta̱ Timoteo ñuu Tesalónica ña̱ chi̱ndeéra na̱ hermano tá yáʼana nu̱ú tu̱ndóʼo. Tándi̱ʼi ta̱ Pablo  chi̱ndaʼára ta̱ Timoteo ña̱ ku̱ʼu̱nra kotora ku̱a̱ʼá na̱ congregación ta chindeérana.

Ta̱ Pablo ni̱ka̱ʼa̱nra xíʼin ta̱ Timoteo: “Na̱ kúni̱ kachíñu nu̱ú Jehová xo̱ʼvi̱vana”. Ta̱ Timoteo ni̱xo̱ʼvi̱vara ta chi̱ka̱a̱nara veʼeka̱a. Soo ta̱yóʼo xi̱kusi̱í-inira chi saá ni̱na̱ʼa̱ra ña̱ ndakú íyo inira ta kándíxaníra Jehová.

Ta̱ Pablo ni̱ka̱ʼa̱nra xíʼin na̱ Filipos: “Chindáʼi̱ ta̱ Timoteo nu̱úndó. Sanáʼa̱ra ndóʼó ña̱ va̱ʼa natúʼunndó xa̱ʼa Ndióxi̱”. Ta̱ Pablo xíni̱ra ña̱ kuchiñu ta̱ Timoteo keʼéraña. Ku̱a̱ʼá ku̱i̱ya̱ ka̱chíñuna nu̱ú Ndióxi̱ ta migo xi̱kuuna.