Timoteo ua puile mukuendze ua mu cikungulukilo ca mu Listala. Ise ua puile kaNgelengu, kaha va naye va puile kaYundeya. Vanaye Yunise na kukueni Loisi va mu longesele via Yehova tunde ku vunike vueni.

Omo Paulu ua ka menekele Listala mu vungendzi vueni vua mu civali vua ku ambulula, ua muene ngecize Timoteo ua lemene mpundu vamuanaye, kaha ua kele na cizango ca ku va kuasa. Paulu ua laniene Timoteo linga vaye hamo lika mu vungendzi vueni. Mu ku hita ca ntsimbu, Paulu ua longesele Timoteo ku kala na vutongue mu ku ambulula na ku longesa muzimbu ua cili.

Sipilitu santu ya tuamenene Paulu na Timoteo kuose ku va ile. Vutsiki vumo, Paulu ua muene mu cilota umo yala a mu leka a ye ku Masendonia mu ku ka va kuasa. Ngeci Paulu, Timoteo, Silase na Luka va ileko mu ku ambulula na ku ka sokolola vikungulukilo.

Mu Masendonia mbonge ya ku Tesalonika, cingi ca vamala na vampuevo va puile vakua ku tsiliela. Vunoni vamo vaYundeya va kele na cipululu ca Paulu na vakuavo. Ngeci va kunguluile civunga, kaha ca kuatele vamuanetu na ku va tuala kuli vakua ku sika mbonge, nguavo: ‘Ava vamala va pua vitozi va nguvulu ya Loma!’ Miono ya Paulu na Timoteo ya kele mu vusonde, ngeci va tininine ku Mbeleya ku vutsiki.

Vantu va kele ku Mbeleya va kele na cizango ca kama ca ku lilongesa muzimbu ua cili, muomu vaNgelengu hamo lika na vaYundeya va puile vakua ku tsiliela. Vunoni vamo vaYundeya va tundile ku Tesalonika kaha va nehele mbuanja, ngeci Paulu ua ile ku Atena. Timoteo na Silase va salele mu Mbeleya mu ku kaniamesa vamuanaye. Mu nima ya ntsimbu, Paulu ua tumine Timoteo ku Tesalonika ku ka kuasa vamuanaye va kaniame omo va va yandesa.  Mu nima yaco, Paulu ua tumine naua Timoteo ku ka meneka vikungulukilo via vingi na ku va kaniamesa.

Paulu ua lekele Timoteo ngueni: ‘Vaze va tonda ku pangela Yehova va ka va luisa.’ Timoteo va mu yandesele na ku mu haka mu kamenga omo lia lutsilielo lueni. Ua kele na ndzolela ya ku uana ntsimbu ya ku muesa lukakatela lueni kuli Yehova.

Paulu ua lekele vakua Filipu ngueni: ‘Nji li na ku tuma Timoteo kuli enu. A ku mi longesa vika ca lomboloka ku endela mu vusunga, na ku mi longesa vati ve ku ambulula.’ Paulu ua tantekeyele ngecize a hasa ku tsiliela Timoteo. Va pangelele hamo lika na ku pua vavusamba mu miaka ya yingi.