Timoteo eliyaya se telpokatl katli itstoya ipan tlanechikoli tlen Listra. Itata eliyaya griego uan inana eliyaya judía. Inana motokaxtiyaya Eunice, uan iueyinana, Loida. Inijuantij kimachtijkej Timoteo tlen Jehová kema nojua eliyaya konetsi.

Kema Pablo yajki ika ompa tlajtolmoyauato uejka, panok Listra. Nopaya kiitak kenijkatsa Timoteo nelia kinikneliyaya toikniuaj uan nochipa kinekiyaya kinpaleuis. Yeka Pablo kiiljuik Timoteo ma yaui iuaya. Teipa, Pablo kinextilik Timoteo kenijkatsa kuali tlamachtis uan kuali kimoyauas nopa kuali tlamachtili.

ToTeotsij itonal kinyakanayaya Pablo uan Timoteo kampa yauiyayaj. Se youali, Pablo kiitak kejuak ipan se temiktli se tlakatl katli kiiljuik ma yaui Macedonia uan ma kinpaleuiti. Yeka Pablo, Timoteo, Silas uan sekinok toikniuaj yajkej nopaya tlajtolmoyauatoj uan tlapaleuijkej ma onka miak tlanechikoli.

Ipan altepetl Tesalónica, tlen tlali Macedonia, miakej tlakamej uan siuamej mochijkej Cristo itokilijkauaj. Sekij judíos kinkualankaitayayaj Pablo uan iuampoyouaj. Kinsentilijkej maseualmej katli amo kualmej uan kinuauatatskej toikniuaj uan kinuikakej kampa itstoyaj tlanauatianij uan chikauak kiijtojtiauiyayaj: “¡Ni tlakamej kikualankaitaj tlanauatijketl tlen Roma!”. Kinekiyayaj kinmiktisej Pablo uan Timoteo, yeka ika tlayoua cholojkej ne Berea.

Maseualmej tlen Berea kinekiyayaj kikakisej nopa kuali tlamachtili, uan miakej griegos uan judíos mochijkej Cristo itokilijkauaj. Se keskij judíos tlen euayayaj Tesalónica asitoj Berea uan kinajkomankej maseualmej, yeka Pablo yajki Atenas. Timoteo uan Silas mokajkej Berea uan kinyolchikajkej toikniuaj. Ipan Tesalónica, toikniuaj tlauel kintlatsakuiltiyayaj, yeka Pablo kiiljuik Timoteo ma kinpaleuiti  ma kiijiyouikaj nopa tlaouijkayotl. Teipa, Pablo kititlanki Timoteo ma kinpaxalo uan ma kinyolchikaua toikniuaj ipan miak tlanechikoli.

Pablo kiiljuik Timoteo: “Nochi katli kinekij kitekipanosej Jehová, kintlaijiyouiltisej”. Timoteo kitlaijiyouiltijkej uan nojkia kitsajkej pampa tlaneltokayaya. Maske tlaijiyouik, yolpakiyaya pampa kiampa kinextiyaya amo kitlauelkauayaya Jehová.

Pablo kiniljuik toikniuaj tlen altepetl Filipos: “Niinmechtitlanilis Timoteo. Ya inmechmachtis kenijkatsa kuali inmonejnemiltisej uan kenijkatsa intlajtolmoyauasej”. Pablo motemachiyaya ipan Timoteo. Sansejko tlatekipanojkej miak xiuitl uan tlauel kuali mouampojchijkej.