Itech tlanechikol tlen okatka altepetl Listra okatka se telpochtli tlen omotokayotiaya Timoteo. Itajtsin okatka griego uan inantsin judía. Inantsin omotokayotiaya Eunice uan isitsin omotokayotiaya Loida. Yejuan okimachtijkej Timoteo itech Jehová desde ijkuak okatka chokotsin.

Ijkuak Pablo otetlapouito Listra, okitak Timoteo melauak okintlasojtlaya tokniuan uan nochipa okinekiaya kinpaleuis. Ik non, Pablo okilui Timoteo iuan ma uia. Satepan, Pablo okimachti Timoteo ken kuali tlamachtiskia uan tetlapouiskia kuali tlajtolmej itech toTajtsin Dios.

Espíritu santo nochipa okinyekanaya Pablo uan Timoteo. Se yoak, itlaj okinextilijkej Pablo. Ye okitak se tlakatl tlen okilui ma uia altepetl Macedonia ma kinpaleuiti. Ik non, Pablo, Timoteo, Silas uan Lucas oyajkej otetlapouitoj Macedonia uan ompa okinpeualtijkej tlanechikolmej.

Itech Tesalónica, miakej tlakamej uan siuamej opejkej kichiuaj ken Cristo. Pero sekimej judíos okikokoliayaj Pablo uan akinmej iuan oyayaj. Okinnechikojkej miakej tlen amo yolkualmej uan okinuikakej tokniuan inmixpan tekiuajkej. Judíos chikauak okijtojkej: “¡Ninmej tlakamej kixnamikij tekiuajkayotl romano!”. Okinekiayaj kinmiktiskej Pablo uan Timoteo, ik non, ijkuak otlayoak ocholojkej altepetl Berea.

Akinmej ochantiayaj Berea okinekiayaj kixmatiskej toTajtsin Dios uan miakej griegos uan judíos opejkej tlaneltokaj. Pero sekimej judíos tlen oualayaj Tesalónica ompa otlakuejsotoj, ik non, Pablo oyajki Atenas. Timoteo uan Silas omokajkej Berea uan ompa okinyolchikajkej tokniuan. Satepan, Pablo oksepa okititlanki Timoteo itech altepetl Tesalónica uan ompa ye okinyolchika tokniuan akinmej  okintlajyouiltiayaj. Satepan, Pablo okititlanki Timoteo ma kintlajpaloti miakej tlanechikolmej para kinyolchikauaskia tokniuan.

Pablo okilui Timoteo: “Kintlajyouiltiskej akinmej kinekij kitekichiuiliskej Jehová”. Timoteo okitlajyouiltijkej uan okitsakej porque otlaneltokaya. Pero ye oyolpakiaya porque amo keman okika Jehová.

Pablo okinmilui tokniuan tlen ochantiayaj Filipos: “Namechtitlanilis Timoteo. Ye namechmachtis ken nankiyolpaktiskej toTajtsin Dios uan ken nantetlapouiskej”. Pablo otlaneltokaya itech Timoteo. San sekan okitekichiuilijkej toTajtsin Dios miak xiuitl uan kuali omouikakej.