तिमोथि लिस्त्रा मण्डलीका एक जवान भाइ थिए। तिनका बुबा ग्रीक थिए भने आमा यहुदी थिइन्‌। तिनले सानैदेखि आमा युनिस र बज्यै लोइसबाट यहोवा परमेश्‍वरबारे सिकेका थिए।

पावल दोस्रो प्रचार-यात्राको दौडान लिस्त्रा जाँदा तिमोथिले भाइहरूलाई साँच्चै माया गरेको र तिनीहरूलाई मदत गर्न उत्सुक भएको याद गरे। तिनले तिमोथिलाई आफूसँगै यात्रामा जान निम्तो दिए। समयको दौडान पावलले तिमोथिलाई असल प्रचारक र सुसमाचारको शिक्षक हुन तालिम दिए।

पावल र तिमोथि जहाँसुकै गए पनि पवित्र शक्‍तिले तिनीहरूलाई डोऱ्‍याउँथ्यो। एक रात दर्शनमा पावललाई एक जना मानिसले म्यासिडोनिया आएर तिनीहरूलाई मदत गर्न भने। त्यसैले पावल, तिमोथि, सिलास र लुका त्यहाँ प्रचार गर्न र मण्डलीहरू स्थापना गर्न गए।

थिस्सलोनिकाको म्यासिडोनिया भन्‍ने सहरमा थुप्रै पुरुष र स्त्री ख्रिष्टियन बने। तर यो देखेर केही यहुदीले पावल र तिनका सहयात्रीहरूको डाह गर्न थाले। ती यहुदीहरूले हुल जम्मा गरेर पावल र तिनका सहयात्रीहरूलाई नगर प्रशासकहरूकहाँ घिसार्दै लगे अनि यसो भन्दै कराए: ‘यिनीहरू रोमी सरकारका शत्रुहरू हुन्‌।’ पावल र तिमोथिको ज्यान खतरामा थियो। त्यसैले तिनीहरू राती नै बिरिया भागे।

बिरियाका मानिसहरू सुसमाचारबारे सिक्न उत्सुक थिए। त्यहाँका ग्रीकहरू र यहुदीहरूले ख्रिष्टमा विश्‍वास गर्न थाले। तर केही यहुदीहरूले थिस्सलोनिकाबाट आएर हुलदङ्‌गा मच्चाउन थाले। त्यसैले पावल एथेन्स गए। तिमोथि र सिलासचाहिँ भाइहरूलाई बलियो बनाउन बिरियामै बसे। थिस्सलोनिकाका भाइहरूले एकदमै खेदो भोगिरहेकोले पावलले तिमोथिलाई पछि फेरि त्यहाँ पठाए। पछि पावलले तिमोथिलाई अरू थुप्रै मण्डलीको भ्रमण गर्न र प्रोत्साहन दिन पठाए।

 पावलले तिमोथिलाई भने: ‘परमेश्‍वरको सेवा गर्न चाहनेहरू सबैमाथि खेदो आइपर्नेछ।’ तिमोथिले खेदो भोगे र आफ्नो विश्‍वासको लागि कैदमा परे। तर यहोवा परमेश्‍वरप्रति आफ्नो वफादारी देखाउने मौका पाएकोमा तिनी आनन्दित थिए।

पावलले फिलिप्पिका भाइहरूलाई भने: ‘म तिमीहरूकहाँ तिमोथिलाई पठाउँदै छु। तिनले तिमीहरूलाई यहोवा परमेश्‍वरको सेवकको रूपमा जिउनुको अर्थ सिकाउनेछन्‌।’ तिमोथि भरोसायोग्य छन्‌ भनेर पावललाई थाह थियो। तिनीहरू मिल्ने साथी थिए र धेरै वर्ष सँगै मिलेर सेवा गरेका थिए।