Timoteus okwa li omumwatate omugundjuka gwomegongalo lyaListra. He okwa li Omugreka nayina Omujuda. Yina Eunike nayinakulu Loide oya li ye mu longo kombinga yaJehova okuza kuunona we.

Sho Paulus a li ta talele po Listra molweendo lwe lwuutumwa olutiyali, okwa mono kutya Timoteus oku hole aamwahe nokwa halelela oku ya kwathela. Okwa pula Timoteus a ye pamwe naye molweendo lwe. Momukokomoko gwethimbo, okwe mu dheula a kale omuuvithi nomulongi gwonkundana ombwanawa a pyokoka.

Ombepo ondjapuki oya li ya wilike Paulus naTimoteus kehe mpoka ya yi. Uusiku wumwe omulumentu gumwe okwa lombwele Paulus memoniko a ye kuMakedonia a ka kwathele aantu yaahoka. Onkee ano, Paulus, Timoteus, Silas naLukas oya yi ko, ye ku uvithe nokutota omagongalo.

Aalumentu naakiintu oyendji yomoshilando Tessalonika shomuMakedonia, oya ningi ooitaali. Ihe yamwe yomAajuda oya li ya sila efupa Paulus nayakwawo. Oya gongele ongundu yaantu noya hilile Paulus nooyakwawo kaapangeli yoshilando taya ti: ‘Aantu mbano aatondi yepangelo lyaRoma!’ Paulus naTimoteus oya li ye li moshiponga, onkee oya fadhukile kuBerea uusiku.

Aantu yomuBerea oya li ya halelela okuuva onkundana ombwanawa, nAajuda nAagreka oyendji yaamoka oya ningi ooitaali. Ihe sho Aajuda yamwe ya zi kuTessalonika e taya tameke okuhongakanitha aantu, Paulus okwa yi kuAtena. Timoteus naSilas oya kala muBerea ya ladhipike aamwahe. Konima yethimbo, Paulus okwa tumu Timoteus kuTessalonika a ka kwathele aamwahe mboka  ya li taya hepekwa nayi. Konima Paulus okwe mu tumu a ka talele po omagongalo galwe noku ga tsa omukumo.

Paulus okwa lombwele Timoteus a ti: ‘Mboka ya hala okulongela Jehova, otaya ka hepekwa.’ Timoteus okwa li a hepekwa nokwa li a falwa mondholongo omolweitaalo lye. Okwa li a nyanyukwa sho a mono ompito yokuulika kutya ye omudhiginini kuJehova.

Paulus okwa lombwele Aafilippi a ti: ‘Otandi tumu Timoteus kune. Ote ke mu longa nkene mu na okukala aapiya yaJehova note ke mu dheula nkene mu na okuuvitha.’ Paulus okwa li e shi kutya ota vulu okwiinekela Timoteus. Oya li ya longo pamwe ye li ookuume noya kala taya longele Jehova uule woomvula odhindji.