Timoteo aari mmiravo a muloko wa o Lustra. Atiithi awe yaari Mukiriki nave amannya yaari Muyuta. Amannya Eunise ni amunnawe Loisi yaanamuhusiha Timoteo vooloca sa Yehova ari mwaana.

Vaavaa Paulo aaxekunryeiye o Lustra mmukwaha awe wanaawiili, owo ahiiwa sa Timoteo wi aanaasivela anna nave aanaakhaviherya. Paulo aanwopa wi echaanane vamoha mmukwaha awe. Elukuluku yeeyo Paulo aamuvyakiha Timoteo olaleerya phaama ni ohusiha michaka yaphaama.

Munepa waweela waamuhoolela Paulo ni Timoteo weiwo yaayaayawo. Ohiyu omoha, mu yawoona, mulopwana aamuleela Paulo wi aye o Maketoniya wi akhaviherye. Paulo, Timoteo, Sila ni Luka yaaya olaleerya ni opaka miloko.

Epooma ya Maketoniya o Tesalonika, alopwana ancipale ni athiyana yaakhala Akristu. Nyenya Ayuta akina yaakhalano nrima ni Paulo ni asinthamwene awe. Awo yaahaaphara anna nave yaakeriha wa atokweene a epooma enakhuwela eriki: ‘Alopwana ala amwiicani a olamulelo wa o Roma.’ Paulo ni Timoteo yaakhala mmakacamihoni, awo yaachawa eyaaka o Pereya elukuluku ya ohiyu.

Achu o Pereya yaanasiveliwa ohuserya michaka yaphaama nave Ayuta ni Akriki yaapacerya ororomela. Nyenya vaavaa Ayuta akina yaaruulaaya o Tesalonika echawaka makacamiho, Paulo aahala o Atena. Timoteo ni Sila yaakhala o Pereya yaalipihaka anna. Moovira wa elukuluku Paulo aamurumiha Timoteo oya o Tesalonika wi aalipihe anna nthowa na makacamiho yaakumanaayano. Voocharela, Paulo aamurumiha Timoteo oxekurya miloko mikina ni waalipiha anna.

Paulo aamuleela Timoteo ariki: ‘Oothene ale anakhwela omuchara Yesu Kristu eni enaamwiikariwa.’ Timoteo aaniiciwa ni owaleliwa  nthowa na nroromelo nawe. Owo aanapharihela makacamiho yaawo wi ooniherye nroromelo nawe wa Yehova.

Paulo aaloca wa Afilipi: ‘Kinaweherya voohilekela woorumihelaani Timoteo. Onamoohusihaani weeca mu eparipari ni woovyakihaani mu olaleerya.’ Paulo aanasuwela wi aahaala okhalano munkhela ni Timoteo. Awo yaalapa vamoha monthamwene nave yaarumeela mu iyaakha sincipale.