Phuthegong ya motseng wa Lisitara go be go na le ngwanabo rena wa moswa yo a bitšwago Timotheo. Tatagwe e be e le Mogerika, gomme mmagwe e le Mojuda. Mmago Timotheo e lego Yunise, le makgolo wa gagwe e lego Loisa, ba ile ba mo ruta ka Jehofa go tloga boseeng.

Paulo o ile a etela motseng woo wa Lisitara ka lekga la bobedi gore a yo bolela ditaba tše dibotse. Ge a le moo, o ile a lemoga gore Timotheo o rata batho ba ka phuthegong e bile o a ba thuša. Ka baka leo, Paulo o ile a kgopela Timotheo gore a sepele le yena ge a tšama a ruta batho ka Mmušo wa Modimo. Ge nako e dutše e eya, Paulo o ile a ruta Timotheo gore le yena a kgone go botša batho ditaba tše dibotse tša Mmušo wa Modimo le go ruta.

Moya o mokgethwa o be o thuša Paulo le Timotheo kae le kae mo ba bego ba eya gona. Bošegong bjo bongwe, Modimo o ile a bontšha Paulo pono. Ponong yeo, Paulo o ile a bona monna yo mongwe a mmitša gore a tle a ba thuše kua Matsedonia. Ka gona, Paulo, Timotheo, Silase le Luka, ba ya Matsedonia gomme ba fihla ba ruta batho ka Mmušo wa Modimo le go thoma diphuthego.

Motseng wa Thesalonika, woo o lego Matsedonia, banna ba bantši le basadi ba ile ba fetoga Bakriste. Eupša Bajuda ba bangwe ba be ba sa rate Paulo le batho bao a bego a sepela le bona. Ba ile ba kgobokana gomme ba gogela bana babo rena bao go babuši ba motse woo, gomme ba goeletša ba re: ‘Batho ba ba lwa le mmušo wa Roma!’ Ka ge Paulo le Timotheo ba be ba le kotsing, ge e eba bošego ba ile ba tšhabela motseng wa Berea.

Batho ba kua Berea ba be ba rata go kwa ditaba tše dibotse tša Mmušo wa Modimo. Ka gona Bagerika le Bajuda ba motseng woo, ba ile ba fetoga Bakriste. Eupša Bajuda ba bangwe bao ba tšwago Thesalonika ba ile ba tla motseng woo wa Berea gomme ba tsoša ntwa, ke moka Paulo a tloga moo a ya Athene. Timotheo le Silase ba ile ba šala motseng woo  wa Berea gore ba matlafatše tumelo ya bana babo rena. Ge nako e dutše e eya, Paulo o ile a romela Timotheo kua Thesalonika gore a yo thuša bana babo rena ba moo gore ba kgone go kgotlelela ge ba tlaišwa. Ka morago, Paulo o ile a roma Timotheo gore a etele diphuthego tše dingwe tše dintši le go di matlafatša.

Paulo o ile a botša Timotheo a re: ‘Bao ba nyakago go hlankela Jehofa ba tlo swarwa gampe.’ Ka ge Timotheo le yena a be a hlankela Jehofa, o ile a swarwa gampe le go golegwa. Seo se ile sa mo thabiša, ka gobane se ile sa mo fa sebaka sa go bontšha gore o rata Jehofa.

Paulo o ile a botša Bafilipi a re: ‘Ke romela Timotheo go lena. O tla le ruta kamoo le swanetšego go hlankela Jehofa, e bile o tla le bontšha kamoo le swanetšego go ruta batho ka Mmušo wa Modimo.’ Paulo o be a tseba gore Timotheo o be a tla kgona go ba thuša, ka gobane ba be ba feditše mengwaga e mentši ba hlankela Modimo ba le gotee e bile e le bagwera.