Timoseo akaba ari ow’eishe-emwe muto omu kibiina kya Lusitura. Ishe akaba ari Omugriika, kandi nyina ari Omuyudaaya. Nyina wa Timoseo Yunike, na nyinenkuru Loisi bakamwegyesa ebirikukwata ahari Yehova kuruga omu buto.

Obu Paulo yaaza omuri Lusitura omu rugyendo rwe rwa kabiri, akeetegyereza ngu Timoseo naakunda ab’eishe-emwe kandi ngu aine ekihika ky’okubahwera. Paulo akeeta Timoseo kumwegaitaho omu ngyendo ze. Ku haahingwireho obwire, Paulo akatendeka Timoseo kuba omwegyesa kandi omubuurizi murungi w’amakuru marungi.

Omwoyo gurikwera gukeebembera Paulo na Timoseo ei baabaire baza hoona. Izooba rimwe, Paulo akatunga okworekwa, omushaija arikumugambira kuza Makedonia kubahwera. N’ahabw’ekyo Paulo, Timoseo, Siila, na Luka bakazayo kubuurira nookutandikayo ebibiina.

Omuri Makedonia orurembo rwa Tesalonika, abashaija n’abakazi baingi bakahinduka Abakristaayo. Kwonka bamwe aha Bayudaaya bakagirira Paulo na bagyenzi be eihari. Baakarundaana abantu baingi baakwata ab’eishe-emwe baabatwara ow’omutegyeki w’orurembo, baamugira bati: ‘Abashaija aba n’abazigu ba gavumenti ya Rooma.’ Amagara ga Paulo na Timoseo gakaba gari omu kabi, n’ahabw’ekyo omu kiro bakahungira Beroya.

Abantu b’omuri Beroya bakaba baine ekihika ky’okwega amakuru marungi, kandi Abayudaaya n’Abagriika bakaikiriza. Kwonka Abayudaaya abamwe ku baarugire Tesalonika bakareetaho oburemeezi, Paulo akaza Aseene. Timoseo na Siila bakaguma omuri Beroya kugumya ab’eishe-emwe. Ku haahingwireho obwire, Paulo akoohereza Timoseo kugaruka Tesalonika kuhwera ab’eishe-emwe abaabaire nibahiiganisibwa munonga. Bwanyima, Paulo akoohereza Timoseo kutaayaayira ebibiina ebindi bingi n’okubigumya.

 Paulo akagambira Timoseo ati: ‘Abarikwenda kuheereza Yehova nibaija kuhiiganisibwa.’ Timoseo akahiiganisibwa kandi yaateebwa n’omu kihome ahabw’okwikiriza kwe. Akashemererwa ahabw’okuba akooreka ngu naayesiga Yehova.

Paulo akagambira Abafilipi ati: ‘Naayohereza Timoseo. Naija kubeegyesa oku mushemereire kugyendera omu mazima, kandi naija kubatendeka omu kubuurira.’ Paulo buzima akaba naayesiga Timoseo. Bakaheereza kumwe nk’abanywani kandi nk’ab’eishe-emwe kumara emyaka mingi.