Joven Timoteoqa Listra congregacionpi kasharqa. Tatanqa griego karqa, mamantaj judía. Mamanqa Eunice sutikorqa, awelitantaj Loida. Paykunaqa wawitamantapacha Timoteoman Diosmanta yachacherqanku.

Pabloqa iskay kaj kutipi willaj rishaspa, Listraman rerqa. Chaypitaj rikorqa Timoteo hermanosta mayta munakusqanta, yanapariytataj munasqanta. Chayrayku Pabloqa Timoteota wajyarerqa paywan khuska willaj rinanpaj. Chantá aswan qhepaman Pabloqa Timoteota wakicherqa sumajta predicananpaj, sumajtataj yachachinanpaj.

Diosqa Pablota Timoteota ima mayman rejtinkupis atiyninwan yanaparqa. Uj chʼisi Pabloman mosqoypi jina uj runa nerqa: “Macedoniaman jamuriy ari yanaparinawaykupaj”, nispa. Pablo, Timoteo, Silas, Lucas imataj Macedoniaman predicaj, congregacionesta sayarichej ima rerqanku.

Macedoniamanta Tesalonicapitaj ashkha runas cristianosman tukorqanku. Wakin judiostaj Pablomanta, compañerosninmantawan envidiakorqanku. Chayrayku sajra runasta tantaytawan hermanosta qhatatacherqanku llajtata kamachejkunaman. Nerqankutaj: “Kay runasqa Romamanta gobiernoj contranpi kashanku”, nispa. Pablowan Timoteowanqa kausayninku wañuy pataman churasqa kasqanrayku tutan Bereaman ayqerqanku.

Bereamanta runasqa Diosmanta sumaj willaykunata uyariyta munarqanku. Ashkha griegos, judíos imataj Diospi creerqanku. Wakin judíos Tesalonicamanta jamuspataj chʼajwata rikhuricherqanku, Pablotajrí Atenasman riporqa. Timoteowan Silaswantaj Bereapi qhepakorqanku hermanosta kallpachanankupaj. Qhepamantaj Pabloqa Timoteota Tesalonicaman kacharqa,  qhatiykachasqa kaj hermanosta kallpachananpaj. Chantá waj congregacionesta kallpachananpajpis kachallarqataj.

Pabloqa Timoteoman nerqa: “Jehová Diosta sirviyta munajqa qhatiykachasqa kanqa”, nispa. Timoteoqa creeyninrayku qhatiykachasqa, carcelman wisqʼasqa karqa. Jinapis kusisqallapuni karqa. Ajinamantataj Diosta mana wasanchasqanta rikucherqa.

Pabloqa Filiposmanta hermanosman nerqa: “Timoteota kachamusqaykichej. Paytaj yachachisonqachej imaynatachus Diosta sirviyta, imaynatachus predicayta ima”, nispa. Pabloqa Timoteo chayta allinta ruwananta yacharqa. Paykunaqa ashkha watasta khuska Diosta sirverqanku, sumaj amigostaj karqanku.