Timoteo are jun ala cristiano kʼo pa ri congregación re Listra. Ri utat are griego, ri unan judía. Ri unan ubʼiʼ Eunice, ri ratiʼt ubʼiʼ, Loida. E areʼ xkikʼut chuwach Timoteo chrij Jehová are chiʼ kʼa nitzʼ na.

Are chiʼ Pablo xusolij Listra pa ri ukamul uviaje che utzijoxik ri utzij ri Dios, xrilo che Timoteo qas keʼuloqʼoqʼej ri e qachalal xuqujeʼ amaqʼel keʼutoʼ. Rumal laʼ, Pablo xubʼij che Timoteo che kbʼe rukʼ pa ri uviaje. Are chiʼ xqʼax ri tiempo, Pablo xutijoj Timoteo rech kux jun utzalaj ajtij xuqujeʼ jun utzalaj ajtzijol re ri utzij ri Dios.

Ri uxlabʼixel xukʼam ubʼe Pablo xuqujeʼ Timoteo apachiʼ taneʼ ri kebʼe wi. Pa jun chaqʼabʼ, Pablo xril jun visión. Xril jun achi che kubʼij che kbʼe pa Macedonia rech kuya tobʼanik. Rumal laʼ Pablo, Timoteo, Silas xuqujeʼ Lucas xebʼe che utzijoxik ri utzij ri Dios xuqujeʼ che ubʼanik congregaciones.

Pa ri tinamit macedonia re Tesalónica, e kʼi chke ri achijabʼ xuqujeʼ ixoqibʼ xeʼux cristianos. Are kʼu jujun judíos itzel kkil Pablo xuqujeʼ ri e rachiʼl. Xekimulij kʼi itzel taq winaq xekijururej bʼi ri e qachalal xekikʼam bʼi chkiwach ri qʼatal taq tzij re ri tinamit. Ri e judíos xkiraq kichiʼ xkibʼij: «¡Ri achijabʼ riʼ kkibʼan kikʼulel che ri qʼatbʼal tzij re Roma!». Ri kikʼaslemal Pablo xuqujeʼ Timoteo kʼo pa kʼax, rumal laʼ rajawaxik che xeʼanimaj bʼi chaqʼabʼ pa Berea.

Ri e winaq re Berea kkaj kkita ri utzalaj taq tzij re ri Dios, kʼi chke ri e griegos xuqujeʼ judíos xekojonik. Are kʼu jujun judíos re Tesalónica xeʼopan che ubʼanik kʼax. Tekʼuriʼ, Pablo xbʼe pa Atenas. Timoteo xuqujeʼ Silas xekanaj kan pa Berea che uyaʼik kichuqʼabʼ ri e qachalal. Qʼaxinaq chi ri tiempo, Pablo xutaq bʼi  Timoteo jumul chik pa Tesalónica rech keʼutoʼ ri e qachalal che uchʼijik ri kʼax che kbʼan chilaʼ. Pa jun chi tiempo, Pablo xutaq bʼi Timoteo che kisolixik xuqujeʼ uyaʼik kichuqʼabʼ kʼi congregaciones.

Pablo xubʼij che Timoteo: «Ri kkaj kkipatanij Jehová kbʼan kʼax chke». Timoteo itzel xilik xuqujeʼ xtzʼapix pa cárcel rumal ri ukojonik. Are kʼu areʼ xkikot rumal che rukʼ waʼ kkunik kukʼutu che sukʼ chuwach Jehová.

Pablo xubʼij chke ri filipenses: «Kintaq bʼi Timoteo iwukʼ. Areʼ kukʼut chiwach ri kibʼan che bʼinem pa ri qastzij xuqujeʼ che utzijoxik ri utzij ri Dios». Pablo xukubʼsaj ukʼuʼx chrij Timoteo. Kʼi junabʼ junam xkipatanij ri Dios xuqujeʼ xeʼux utz taq achiʼl.