Joven Timoteoca Listra congregacionpimi sirvirca. Paipaj yayaca griegomi carca. Paipaj mamaca judiami carca. Paipaj mama Eunice, paipaj abuela Loidapish Timoteomanca uchilla pachamantami Jehovamanta yachachircacuna.

Pabloca Listra pueblomanmi cutin rirca. Chaipimi congregacionpi caj huauqui panicunata Timoteo cꞌuyashcamanta ayudanata munashcata ricurca. Chaita ricushpami Timoteotaca paihuan richun invitarca. Qꞌuipa punllacunaca alli yachachij cachun, alli huillaj cachunmi Pabloca Timoteota yachachirca.

Pablota, Silastapish Diospaj espiritumi maiman rinata yuyachirca. Shuj tutaca Pabloca shuj muscuipi shinami shuj runata ricurca. Chai runaca, ‘Macedonia llajtaman rishpa ayudagri’ nircami. Chaimantami Pablo, Timoteo, Silas, Lucaspish chaiman rishpa Diosmanta huillarcacuna. Chashnallataj congregacioncuna mirarichunmi ayudarcacuna.

Macedonia llajtapi caj Tesalónica pueblopica achcacunami Jesusta catijcuna tucurca. Pero, huaquin judiocunaca Pablota, paihuan rijcunatapish envidiarcacunami. Chaimantami millai gentecunata tandachishpa paicunata sirij sirij aisashpa mandajcunapajman aparcacuna. Judiocunaca, ‘cai runacunaca Roma llajtata mandajpaj contracunami can’ nircacunami. Paicunata llaquichigrishcamantami Pablopish Timoteopish tuta paca tucushpa Berea puebloman rircacuna.

Bereapi causajcunaca Diosmanta uyanatami munarcacuna. Chaimantami griegocuna, judiocunapish Jesusta catijcuna tucurca. Pero, Tesalonicamanta caj judiocunaca problemacunata rurasha nishpami Bereaman shamurcacuna. Chaita yachashpami Pabloca Atenasman rirca. Cutin Timoteoca Silashuanmi huauquicunata panicunata animangapaj Bereapi saquirircacuna. Qꞌuipa punllacunaca Pabloca cutinmi Timoteota Tesalonicaman cacharca.  ¿Imapajtaj cacharca? Chaipi caj huauqui panicunata llaquicunahuan cajpi ayudachunmi cacharca. Qꞌuipaca shujtaj congregacioncunatapish visitachun, animachunmi cacharca.

Pabloca Timoteomanca, ‘Diosta sirvisha nijcunataca llaquichishcami canga’ nircami. Jesusta catij cashcamantami Timoteoca llaquicunata aparca, carcelpipish churashca carca. Chashna jahuapish Diosta cazushcamantami cushilla sintirirca.

Pabloca Filipos pueblopi causajcunataca, ‘Timoteotami cachagrini. Paimi Diosta ima shina sirvinata, ima shina huillanata yachachinga’ nircami. Pabloca Timoteopimi confiarca. Achca huatacunatami ishquindij Diosta sirvishpa alli amigocuna carca.