Timoteo mozoqa Listra llaqtapi iñiqkunawanmi huñunakurqa. Mamanpa sutinmi karqa Eunice abuelanpañataqmi Loida. Paykunam Timoteomanqa Jehova Diosmanta taksachanmantapacha yachachirqaku. Taytanmi ichaqa karqa Grecia nacionniyuq Diospi mana iñiq runa.

Iskay kutipi llaqtakunata watukusqanpim Pabloqa Listra llaqtaman chayarurqa, chaypim yacharurqa iñiqmasinkunata Timoteo yanapasqanmanta. Chaymi llaqtakunaman riysinanpaq pusarqa, hinaspam yachachirqa allin yachachiq kananpaq chaynataq Diosmanta allin willakuq kananpaqpas.

Pablotawan Timoteotaqa Diospa chuya espiritunmi yanaparqa. Huk tutam musquyninpi hina huk runa Pablota nirqa: “Macedoniaman hamuy yanapawanaykikupaq”, nispa. Chaymi Pabloqa Timoteowan, Silaswan hinaspa Lucaswan rirqaku Diosmanta willakuspa llaqtakunapi Diospi iñiqkuna rikurinanpaq.

Tesalonica llaqtapim achkallaña runakuna Jesuspa qatiqninña karqaku. Chaymi wakin judiokunaqa Pablotawan puriqmasinkunata chiqnikuspanku, qatataspankuraq autoridadkunaman pusarurqaku, hinaspam nirqaku: “Roma nacionta kamachiqpa contranpim kay runakunaqa kachkanku”, nispa. Pablowan Timoteoqa wañuymanta lluptispankum Berea llaqtaman ayqikurqaku.

Berea llaqtapi yachaq achkallaña runakunam Diosmanta yachayta munaspanku Jesuspa qatiqninña karqaku. Wakin judiokunam ichaqa Tesalonica llaqtamanta hamuruspanku runakunata umacharqaku mana uyarinankupaq, chaymi Pabloqa Atenas llaqtamanña rirqa. Timoteowan Silasñataqmi Berea llaqtapiraq qiparqaku iñiqmasinkunata yanapanankupaq. Chaymantam Pabloqa Timoteota Tesalonica llaqtaman  kacharqa chaypi ñakariq iñiqmasinkunata kallpanchananpaq. Kacharqataqmi huk lawpi huñunakuq iñiqmasinkunata kallpanchananpaqpas.

Pablom Timoteota nirqa: “Jehova Diosta yupaychaqkunaqa ñakarichisqam kanqaku”, nispa. Chayna nisqanman hinam Timoteopas Diospi iñisqanrayku ñakarichisqa hinaspa presochasqa karqa, chaywanpas Jehova Diosman sunqu kasqanraykum kusikurqa.

Filipos llaqtapi yachaqkunatapas Pabloqa nirqam: “Timoteom allinta kallpanchasunkichik hinaspapas Diosmanta willakunaykichikpaqmi yachachisunkichik”, nispan. Timoteowan Pabloqa unay watakunam kuskanku Diosmanta willakurqaku.