Timoteo waynaqa Listra llaqtapi iñiq t’aqamantan karan. Papanmi griego karan mamantaq judía. Mamanpa sutinmi Eunice karan, abuelanpa sutintaq Loida. Paykunan Timoteoman Diosmanta yachachiranku wawa kasqanmantapacha.

Pablo iskay kaq viajenpi Listra llaqtata visitashaqtinmi rikuran Timoteoqa hermanokunata munakusqanta yanapayta munasqantapas. Chaymi Pabloqa Timoteota invitaran paywan kuska viajananpaq. Tiempowanmi Pabloqa Timoteota yanaparan Diospa siminmanta allin yachachiq kananpaq.

Santo espiritun Pablota Timoteotawan pusaran maypichus predicanankupaq. Juj tutan, Pabloqa rijuriypi rikuran juj runa Macedoniaman rinanpaq valekusqanta. Chaymi Pabloqa, Timoteowan, Silaswan, Lucaswan ima predicaq riranku iñiq t’aqakunata jatarichiq ima.

Macedoniapin tarikuran Tesalónica llaqta, chay llaqtamanta askha runakunan cristiano kapuranku. Wakin judiokunan ichaqa Pablomanta compañeronkunamantawan envidiakuranku. Jinaspa hermanokunata millay runakunawan llaqtapi kamachikuqkunaman apachiranku, qaparirankutaq: “¡Kay runakunan Roma gobierno contra jatarinku!”, nispa. Pablopas Timoteopas peligropin tarikusharanku, chaymi Berea llaqtaman tuta ayqekuranku.

Berea runakunaqa uyariytan munaranku Diospa siminta, chaymi askha griegokuna judiokunapas cristiano kapuranku. Ichaqa wakin judiokunan Tesalónica llaqtaman jamuspanku ch’aqwata jatarichiranku. Chaymi Pabloqa Atenas llaqtaman riran. Timoteo Silaswanmi ichaqa Bereapi qhepakuranku hermanokunata kallpachaspa. Tiempowanmi Pabloqa Timoteota kacharan Tesalónica  llaqtapi iñiqkunata kallpachananpaq, paykunaqa sinchi qatikachasqan kasharanku. Chay qhepamantaq Timoteota kacharan askha iñiq t’aqakunata visitaspa kallpachananpaq.

Pablon Timoteota niran: “Diosta serviyta munaqkunaqa qatikachasqan kanqaku”, nispa. Diospi iñisqanraykun Timoteoqa qatikachasqa karan, carcelpipas wisq’aranku. Chaywanpas kusisqa karan Diospaq junt’aq sonqo kasqanmanta.

Pablon Filipos llaqtapi hermanokunata niran: “Timoteota kachamusaykichis, paymi yachachisunkichis Diosta imayna serviyta, imayna predicaytapas”, nispa. Pabloqa confiaranmi Timoteopi, askha watan kuska llank’aranku, amigontintaqmi karankupas.