Timoteoca Listra llactapi congregacionmanda joven huauquimi carca. Paipa taitaca Grecia llactamandami carca. Cutin paipa mama Eunice, paipa abuela Loidapash Judá llactamandami carca. Paicunami Timoteotaca uchillamandapacha Jehovamanda yachachishpa viñachirca.

Pabloca Listra llactapi cutin villachingapaj rishpami, Jesusta catijcunata Timoteo tucui shunguhuan juyajta, paicunata siempre ayudangapaj munashcatapash ricurca. Chaimandami Pabloca Timoteotaca caru llactacunapi villachingapaj invitarca. Jipamanga Pabloca Timoteotaca Taita Diosmanda ali villaicunata ali yachachichun, ali villachichunbashmi yachachirca.

Pablota, Timoteotaca Diospa espíritu santomi maiman rijpipash ayudan carca. Shuj tutaca muscuipi shinami Pabloca shuj jari “Macedonia llactapi ñucanchiman yachachingapaj shamupai” nijujta ricurca. Chaimi Pablo, Timoteo, Silas, Lucaspash chai llactapi villachingapaj, congregaciongunata callarichingapaj rirca.

Chaimi Macedonia llactamanda Tesalónica pueblopica ashtaca jaricuna, huarmicunapash Jesusta catijcuna tucurca. Shinapash huaquin judiocunaca Pablotapash, paipa cumbacunatapash na ricunayachinllu carca. Chaimi chai judiocunaca ashtaca nali gentecunahuan tandanajushpa Pablota, paipa cumbacunatapash chai llactata mandajcunapaman aparca. Judiocunaca cashnami caparinajurca, cai runacunaca Roma llactata mandajcunapa contracunami can nishpa. Pablopa, Timoteopa causaica peligropimi carca. Chaimi paicunaca chai tutallata Berea llactaman pacajushpa rirca.

Berea llactapi gentecunaca Diospa ali villaicunata ninandami alicachirca. Chaimi ashtaca griego gentecuna, judiocunapash Jesusta catijcuna tucurca. Tesalonicamanda judiocuna cutin llaquichingapaj rijpimi Pabloca Atenas llactaman rirca. Shinapash Timoteo, Silasca Berea llactapi huauquipanicunata shinlliyachingapami quedarca. Tiempo yalijpica Pabloca, cutinmi Timoteotaca Tesalónica llactapi llaquichi tucushca huauquipanicunata shinlliyachishpa ayudachun cacharca. Chai jipaca Pabloca, Timoteotaca ashtaca congregaciongunata visitachun, animachunmi cacharca.

 Pabloca, Timoteotaca nircami: Jehovata sirvishpa ‘causangapaj munajcunaca, tucuicunami llaquita apanga’ nishpa. Timoteoca Jehovata sirvimanda llaquichi tucushpami carcelpipash vichai tucurca. Shina llaquicunata chimbapurashpa Jehovatalla tucuipi cazushcata ricuchishpami Timoteoca cushilla sintirirca.

Pabloca Filipos llactapi gentecunamanga nircami: ‘Timoteota cachamusha yajunimi’. Paimi canguna imashina Diosta ali sirvinata, imashina villachinatapash yachachinga nishpa. Pabloca siempremi Timoteopi confiarca. Ishcandimi ashtaca huatacunata Diosta sirvishpa, ali amigocuna carca.