O Timotej hine jekh terno phral ki skupština Listra. Oljeso dad hine Grko, a oljesi daj hine Jevrejka. Oljesi daj, i Evnikija hem oljesi baba, i Loida ando tiknipe sikavdže lje ando Jehova.

O Pavle hine ko dujto misionarsko putovanje ked posetindža i Listra. Tegani dikhlja so o Timotej but manglja e phraljen hem e phenjen hem so but trudindža pe te pomožini ljen. O Pavle vičindža e Timoteje te podžini oljeja. O Pavle sikavdža e Timoteje sar te propovedini hem sar te sikavi e manušen ando šukar haberi.

Kuri god dželje, o sveti duh pomožindža e Pavlese hem e Timotejese. Jekh rat, ki vizija, jekh manuš phendža e Pavlese te avel ki Makedonija te pomožini ljen. Odoljese o Pavle, o Timotej, o Sila hem o Luka dželje odothe te propovedinen hem te čeren neve skupštine.

Ko Solun, kova hine deo andi Makedonija, but murša hem džuvlja ulje hrišćanja. Ama, disave Jevreja hine ljubomorna upro Pavle hem upro okola kola hine oljeja. O manuša kola hine holjame hem nasilna čedisalje hem igardže ljen anglo e dizjake vladarija. On pištindže: „Akala manuša tane protiv i rimsko vlast!“ O Pavle hem o Timotej hine ki opasnost hem odoljese prekali rat on našlje ki Verija.

O manuša ki Verija manglje te sikljon ando šukar haberi. Hem o Grcija hem o Jevreja ulje e Isusese učenikija. Ama, disave Jevreja alje ando Solun hem počmindže te čeren o problemija. Odoljese, o Pavle dželo ki Atina. O Timotej hem o Sila ačhilje ki Verija te šaj te zorjačeren e phraljen. O Pavle bičhaldža e Timoteje te irini pe ko Solun te zorjačeri e phraljen kola odothe hine progonime. Palo odova, o Pavle bičhaldža e Timoteje ko avera skupštine te pomožini e phraljendže hem te zorjačeri ljen.

 O Pavle phendža e Timotejese: „Sa okola kola mangena te služinen e Jehovase ka oven progonime.“ O Timotej hine progonimo hem phanlo sebepi odova ko so verujindža. Ama, ov hine bahtalo so šajindža hem ko asavke situacije te mothovi kobor tano verno e Jehovase.

O Pavle phendža e Filipljanendže: „Bičhalava tumendže e Timoteje. Ov ka mothovi tumendže so značini te živinen premalo odova so sikljiljen hem ov ka sikavi tumen sar te propovedinen.“ O Pavle hine sigurno so ked dela disavi buti e Timotejese, odova ka ovel čerdo. O Pavle hem o Timotej hine but šukar amala hem beršencar zajedno čerdže but buča e Jehovase hem e phraljendže.