Timoti akhali m’phale ku mpingo wa ku Listra. Babace akhali n’Gerego na mai wace akhali Muyuda. Mai wace, Eunise na mbuyace Loidhe apfundzisa Timoti pya Yahova kutomera uwana wace.

Pidaenda Paulu ku Listra paulendo wace waciwiri m’basa yakumwaza mphangwa, iye aona kuti Timoti akhafuna kakamwe abale, pontho akhaaphedza. Paulu aphemba Timoti toera kucita naye ulendo. Ndzidzi onsene, Paulu akhapfundzisa Timoti toera kukhala m’mwazi mphangwa wadidi, pontho mpfundzisi wa mphangwa zadidi.

Nzimu wakucena ukhatsogolera Paulu na Timoti konsene kukhaenda iwo. Ntsiku ibodzi namasiku, kubulukira m’masomphenya, mamuna unango apanga Paulu kuti aende ku Masedhonya toera kaaphedza. Natenepa, Paulu, Timoti, Sila na Luka aenda kweneko toera kamwaza mphangwa mbakhazikisa mipingo.

Anthu azinji adzakhala Akristu ku Masedhonya nzinda wa Tesalonika. Mbwenye, Ayuda anango akhaida Paulu na andzace. Iwo apita pakati pa mwinji, aphata abale mbaenda nawo kuna ntongi wa nzinda, mbakhuwa: ‘Amuna awa ndi anyamalwa a utongi Waciroma!’ Umaso wa Paulu na Timoti ukhali pangozwi, natenepa iwo athawa camasiku mbaenda ku Bhereya.

Anthu a ku Bhereya akhafuna kakamwe kupfundza mphangwa zadidi kuphatanizambo Agerego na Ayuda atoma kukhulupira. Mu ndzidzi udafika Ayuda anango a ku Tesalonika atoma kudzudzumisa mwinji. Na thangwi ineyi, Paulu athawa mbaenda ku Atena. Timoti na Sila apitiriza ku Bhereya toera kuwangisa abale. Ntsiku ibodzi, Paulu atumiza Timoti ku Tesalonika toera kaphedza abale akuti  akhathimbana na mayesero kweneko. Mukupita kwa ndzidzi, Paulu atumiza Timoti toera kaona mipingo inango na kuiwangisa.

Paulu apanga Timoti: ‘Onsene anafuna kutumikira Yahova anadzatcingwa.’ Timoti atcingwa mbaikhwa n’kaidi thangwi ya cikhulupiro cace. Iye atsandzaya thangwi yakukhulupirika kwace kuna Yahova.

Paulu apanga Afilipi: ‘Ine ndikutumiza Timoti kuna imwe. Iye anadzakupfundzisani kuti kusabvekanji kufamba mu undimomwene, pontho anadzakupfundzisani basa ya utumiki.’ Paulu akhadziwa kuti mbadanyindira Timoti. Iwo aphata basa pabodzi ninga axamwali mbapitiriza kutumikira Yahova mu pyaka pizinji.