Timothée ayeke lani mbeni maseka-koli na yâ ti congrégation ti Lystres. Babâ ti lo ayeke Grec, na mama ti lo ayeke Juif. Mama ti lo, Eunice, nga na âta ti lo ti wali Loïs la afa na lo ye na ndö ti Jéhovah ngbene ye na ngoi so lo de kete.

Tongana Paul asara vizite na Lystres, na ngoi ti use tambela ti fango tënë ti lo, lo bâ so Timothée aye tâ aita mingi na lo yeke na nzara ti aidé ala. Paul ahunda na Timothée ti tene lo na lo asara tambela ti fango tënë ni. Tongana ngoi ayeke hon, Paul afa na Timothée ti duti mbeni nzoni wafango tënë nga mbeni zo so ahinga ti fa nzoni tënë.

Yingo vulu afa lege na Paul na Timothée na ndo kue so ala yeke gue dä. Na mbeni bï, na yâ ti mbeni vision, mbeni koli atene na Paul ti gue na Macédoine ti mû maboko na ala. Tongaso Paul, Timothée, Silas nga na Luc ague kâ ti fa tënë nga ti zia gere ti afini congrégation na sese.

Na yâ ti gbata ti Thessalonique, so ayeke na Macédoine, gbâ ti akoli nga na awali aga aChrétien. Me ambeni Juif asara kota bê na terê ti Paul nga na akamarade ti lo. Ala bungbi gbâ ti azo na ala gboto aita ague na ala na amokonzi ti gbata ni, na ala dekongo, atene: ‘Akoli so ayeke awato ti gouvernement ti Rome!’ Fini ti Paul na Timothée ayeke lani na lê ti kuâ, a sara si ala kpe na bï ni ala gue na Bérée.

Azo na Bérée ayeke lani na nzara ti mä nzoni tënë, nga ambeni Juif na aGrec ti ndo ni kâ aga azo so amä na bê. Me ambeni Juif so alondo na Thessalonique aga, na ala bi tomboka na li ti azo, a sara si Paul akpe lo gue na Athènes. Timothée na Silas angbâ ti ala na Bérée ti kpengba aita. Ambeni ngoi na pekoni, Paul atokua Timothée ti kiri na Thessalonique ti aidé aita, tongaso si ala gbu ngangu na yâ ti ngangu tara so asi na ala kâ. Kete na pekoni, Paul atokua Timothée ti gue ti sara vizite na gbâ ti ambeni congrégation na ti kpengba ala.

 Paul atene na Timothée, atene: ‘Fade a yeke sara ye ti ngangu na azo so aye ti voro Jéhovah.’ A sara ye ti ngangu na Timothée nga a bi lo na da ti kanga ndali ti mabe ti lo. Terê ti lo anzere ndali ti so lo wara pasa ti fa so lo yeke be-ta-zo na Jéhovah.

Paul atene na aChrétien ti Philippes, lo tene: ‘Mbi yeke tokua na ala Timothée. Lo yeke fa na ala ye so aye ti tene ti tambela na yâ ti tâ tënë, nga lo yeke fa na ala ti fa tënë nzoni.’ Paul ahinga so lo lingbi ti sara confiance na Timothée. Teti angu mingi, ala sara kua legeoko tongana akamarade nga tongana awakua.