Ximootewoosi Lisxiru songora heeˈrinoho wedellicha rodooti. Annisi Girikichaho; amasi kayinni Ayihudittete. Ximootewoosi qaaqqu heeˈreenna amasi Ewunqenna ahaahesi Loyidi, Yihowa daafira rosiissinosi.

Phaawuloosi sabbakate layinkimeeshsho haˈri yannara, Lisxiru songo towaatino; hakkiicho Ximootewoosi roduuwa baxannotanna insa kaaˈla hasiˈrannota huwatino. Phaawuloosi Ximootewoosi ledosi haˈranno gede koyisi. Phaawuloosi Ximootewoosi worba sawaakicha ikkanno gedenna dancha duduwo seekke rosiisanno gede qajeelsinosi.

Qullaawu ayyaani Phaawuloosinna Ximootewoosi martuwa baalawa kaaˈlinonsa. Mitto hashsha mittu manchi ajuujatenni Phaawuloosira ‘Meqedooniya dagge kaaˈlinke’ yiisi. Konni daafira, Phaawuloosi, Ximootewoosi, Silaasinna Luqaasi sabbakatenna songuwa xintate hakkiira hadhu.

Teselonqe yinannihu Meqedooniyu katamira, lowo labballinna meenti Kiristaana ikkino. Ikkollana, mitu Ayihudete manni Phaawuloosinna ledosi sabbakkannore hinaassu. Insa mannu gibbo kayisanno gede assite, roduuwa amadde katamu gashshaanowa massitu; hakkiinni, ‘Kuni manni Roomu gashshootira baarigaarrate!’ yite cancitu. Phaawuloosinna Ximootewoosi mannu shaannonsata affino daafira, hashsha Beeriya hadhu.

Beeriyaho heeˈranno manni dancha duduwo rosa hasiˈrino; hattono Girikootunna Ayihudootu Kiristaana ikkitino. Ikkollana mitu Ayihudete manni Teselonqe kataminni daye gibbo kayisita, Phaawuloosi Ateena haˈrino. Ximootewosinna Silaasi kayinni roduuwa jawaachishate Beeriyaho gattino. Yannate gedensaanni, Phaawuloosi Teselonqe noo roduuwi iillannonsa qarra dandiite saˈanno gede jawaachishansara, Ximootewoosi galagale hakkira soyino. Qoleno Phaawuloosi  Ximootewoosi wole duucha songuwa towaatannonna jawaachishanno gede soyino.

Phaawuloosi Ximootewoosira, ‘Yihowara soqqantannore mannu giwannonsa’ yiinosi. Ximootewoosi ammanasinni kainohunni mannu giwinosi, hattono usurroonnisi. Isi Yihowara ammanaminoha ikkinota leellishanno faro afiˈrino daafira hagiidhino.

Phaawuloosi Filiphisiyusi songora togo yiino: ‘Ximootewosi kiˈnewa soyeemmo. Isi Yihowa hagiirsiisannori maatironna sabbakkinanni gara rosiisannoˈne.’ Phaawuloosi, Ximootewoosi ammannanni rodoo ikkinota afino. Insa jaallatenna roduuwu gede ikkite lowo diro mitteenni soqqantino.