Timoteyus ben de wan yongu brada fu a gemeente na Listra. En papa ben de wan Grikisma èn en mama ben de wan Dyu. En mama Enise nanga en granmama Lowis leri en fu Yehovah sensi di a ben pikin.

Di Paulus go preiki na difrenti presi a di fu tu leisi, a go na Listra. Drape a si Timoteyus, wan yonguman di ben lobi den brada nanga sisa trutru èn di ben e yepi den. Paulus aksi Timoteyus fu go preiki nanga en na tra presi. A heri pisi ten dati Paulus leri Timoteyus fu de wan bun preikiman fu a bun nyunsu èn wan bun leriman.

Santa yeye ben e tiri Paulus nanga Timoteyus awinsi pe den ben e go. Wan neti Paulus kisi wan fisyun pe wan man kari en fu kon yepi na Masedonia. Dan Paulus, Timoteyus, Silas nanga Lukas go drape fu go preiki èn fu opo gemeente.

Na ini Tesalonika, wan fu den foto fu Masedonia, furu man nanga uma tron Kresten. Ma sonwan fu den Dyu ben dyarusu tapu Paulus nanga den mati fu en. Den kari wan tu ogriman kon, dan den srepi den brada tyari go na den fesiman fu a foto. Den bari: ’Den man disi na feanti fu Rome!’ Paulus nanga Timoteyus ben kan lasi den libi. Dati meki di neti doro, den lowe go na Berea.

Den sma na ini Berea ben lobi a bun nyunsu èn Grikisma nanga Dyu drape tron Kresten. Ma son Dyu di ben kon fu Tesalonika kon meki dyugudyugu drape. Dati meki Paulus go na Ateine. Timoteyus nanga Silas tan na ini Berea fu tranga a bribi fu den brada nanga sisa. Baka wan pisi ten Paulus seni Timoteyus go baka na Tesalonika fu yepi den brada nanga sisa drape di ben e kisi hebi frufolgu drape. Bakaten Paulus seni Timoteyus fu go luku furu tra gemeente èn fu gi den deki-ati.

 Paulus taigi Timoteyus: ’Den sma di wani dini Yehovah o kisi frufolgu.’ Sma frufolgu Timoteyus èn den poti en na strafu-oso fu di a ben de wan Kresten. Ma a ben breiti taki a kisi na okasi fu sori taki a e tan dini Yehovah awinsi san e pasa.

Paulus taigi den brada nanga sisa na ini Filipi: ’Mi e seni Timoteyus kon na unu. A o leri unu fa fu libi soleki fa Yehovah wani èn a o leri unu fu du a preikiwroko.’ Paulus ben sabi taki a ben kan frutrow na tapu Timoteyus. Den tu man disi wroko makandra leki mati furu yari langa.