Timotius kai anạ mangudạ su sidang Listra. I papạe tau Yunani, kụ i mamạe tau Yahudi. Mamạe, i Eunike, dingangi omane, i Lois, něněntiro si sie soal i Yehuwa dongkeng i sie kadodọ.

Su tempong nakoạ sarang Listra su perjalanan utusan injil karuane, i Paulus nakasilo i Timotius sěbạe makěndagẹ̌ su anạu sěmbaụ dingangu mětẹ̌tul᷊ung si sire. Paulus němaringang si Timotius gunang tumol᷊e si sie. Paulus lai něněntiro si Timotius carane tadeạu limembong mapaelẹ̌ měnginjilẹ̌ dingangu měněntiro habarẹ̌ mapia.

Rohkẹ̌ masusi turusẹ̌ měngẹ̌ngahạ si Paulus dingangi Timotius. Piạ su sěhěbi, Paulus nakaěbạ penglihatan. Sěngkatau esẹ nẹ̌dorong tadeạu i Paulus makoạ sarang Makedonia gunang mẹ̌tul᷊ung si sie. Hakị u ene, i Paulus, Timotius, Silas, dingangi Lukas nakoạ sarang tampạ ene gunang měnginjilẹ̌ dingangu měndarisị sidang jamaatẹ̌.

Su soa Tesalonika su Makedonia, lawọ esẹ dingangu wawine nakoạ tau Sahani. Katewe, pirang katau tau Yahudi iri si Paulus dingangu manga hapịe. I sire něngomol᷊ẹ̌ taumata lawọ, bọu ene nẹ̌bawa si Paulus dingangu manga hapịe sarang těngong těmbonangu soa. I sire němansagẹ̌, ’I sire ini kai sědụu pěměrentang Romawi!’ Su tempong hěbị, i Paulus dingangi Timotius timal᷊ang sarang Berea tadeạu tawe pateng.

Tau Berea mal᷊uasẹ̌ něngěndung soal u habarẹ̌ mapia. Tau Yahudi dingangu Yunani sene nakoạ tau Sahani. Su tempong pirang katau tau Yahudi bọu Tesalonika diměnta kụ někoạ masalah, i Paulus nakoạ sarang Athena. Timotius dingangi Silas tatapẹ̌ nẹ̌tanạ su Berea gunang měnoghasẹ̌ anạu sěmbaụ sene. Samurine, i Paulus nẹ̌dorong tadeạu i Timotius mẹ̌bal᷊ị sarang Tesalonika gunang mẹ̌tul᷊ung anạu  sěmbaụ apang nirarihang. Bọu ene, i Paulus něndolohẹ̌ si Timotius pẹ̌tiwo lawọ sidang dingangu pěnoghasẹ̌ si sire.

Paulus nẹ̌bera si Timotius, ’Taumata apang mětẹ̌tahamawu si Yehuwa sarung darihang.’ Timotius nirarihang dingangu nipěnjara ual᷊ingu pangangimange. I sie mal᷊uasẹ̌ botonge něnodẹ i sie masatia si Yehuwa.

Paulus nẹ̌bera su tau Filipi, ’Iạ nẹ̌dorong si Timotius gunang pẹ̌tiwo si kamene. I sie sarung měněntiro si kamene carane měbiahẹ̌ tuhụ katěngadẹ̌, dingangu měněntiro carane měnginjilẹ̌.’ I Paulus masingkạ i Timotius botonge kapěngumbalang. Taunge i rẹ̌dua nědal᷊ahapị dingangu něhal᷊ẹ̌ sěngkasio.