Timóteo mak joven Kristaun ida iha kongregasaun Listra. Ninia aman mak ema Gregu, no ninia inan ema Judeu. Husi kiʼik kedas, Timóteo nia inan Eunice no avó-feto Loide hanorin nia kona-ba Jeová.

Kuandu Paulo vizita Listra durante ninia viajen ba dala segundu, nia nota katak Timóteo hadomi tebes maluk Kristaun sira no prontu atu ajuda sira. Paulo konvida Timóteo atu tuir nia. Paulo mós treinu Timóteo atu bele haklaken liafuan diʼak no hanorin ho matenek.

Espíritu santu sempre dirije Paulo no Timóteo iha fatin naran deʼit. Kalan ida, liuhusi vizaun, Paulo haree mane ida husu nia atu bá Masedónia hodi ajuda sira. Tan neʼe Paulo, Timóteo, Silas, no Lucas bá Masedónia atu haklaken no harii kongregasaun sira.

Iha sidade Tesalónika iha Masedónia, feto no mane barak sai ema Kristaun. Maibé ema Judeu balu laran-moras ba Paulo no ninia maluk sira. Sira halibur ema-lubun no kaer ema Kristaun balu no lori ba ukun-naʼin sira iha sidade neʼe, hodi dehan: ‘Mane sira-neʼe kontra governu Roma!’ Iha kalan, Paulo no Timóteo halai ba Bereia atu ema la oho sira.

Ema iha Bereia gosta atu aprende liafuan diʼak. Ema Gregu no mós ema Judeu barak sai Kristaun. Maibé ema Judeu balu neʼebé mai husi Tesalónika hamosu problema, entaun Paulo bá Atenas. Timóteo no Silas nafatin hela iha Bereia atu hametin ema Kristaun iha neʼebá. Liutiha tempu balu, Paulo husu Timóteo fila fali ba Tesalónika atu ajuda ema Kristaun sira neʼebé hetan terus. Tuirmai, Paulo husu Timóteo atu vizita kongregasaun seluk no hametin maluk sira.

 Paulo dehan ba Timóteo: ‘Ema sira neʼebé hakarak atu serbí Jeová sei hetan terus.’ Ema fó-terus ba Timóteo no hatama nia ba komarka tanba ninia fiar. Timóteo kontente tanba bele hatudu katak nia laran-metin ba Jeová.

Paulo dehan ba ema Kristaun iha Filipe: ‘Haʼu haruka Timóteo ba imi. Nia sei hanorin imi oinsá atu laʼo iha dalan lia-loos nian, no oinsá atu haklaken.’ Paulo hatene katak nia bele tau fiar ba Timóteo. Sira mak belun diʼak no serbisu hamutuk durante tinan barak.