Rahalahy tanora tamy ty fiangona i Lystra tao ty Timoty. Grika ty rae’e, fa Jiosy ty rene’e. I Eonika rene’e naho i Loisa bebei’e ty nampianatse aze ty miomba i Jehovah tamy i reke mbe kede.

Trea i Paoly tamy ty fitilihagne faritse faharoe natao’e ta Lystra tao, fa tea rahalahy sady magniry hagnampe iareo ty Timoty. Le tinao’e hiarake ama’e ty Timoty sady nampea’e hahay hitory naho hampianatse i talily soay.

Nitarike i Paoly naho i Timoty tamy ze nombà iareo i fagnahy masigney. Nahatrea fahitagne ty Paoly tie indraike. Nisy lahilahy nangatake aze hagnampe iareo a Makedonia agne. Le nandeha nitory naho nagnoregne fiangonagne agne ty Paoly, i Timoty, i Silasy naho i Lioka.

Nanjare Kristiana ty ankamaroa ty lahilahy naho ty ampela tamy ty tanà i Makedonia, a Tesalonika agne. Faie nisy Jiosy nialogne i Paoly naho i ragne’e rey. Namory ndaty maro iareo mba hitaritarike an-dry Paoly ho amy ty manam-pahefagne agne, le nikorake i ndaty maroy tie: ‘Fahavalo ty fitondragne Romana ty lahilahy retoagne!’ Fa ho nimate ty Paoly naho i Timoty, le nilay a Beria agne iareo tamy halegney avao.

Fale naharey i talily soay ty ndaty ta Beria agne. Maro tamy iareo, ndra Grika ndra Jiosy ty nanjare mpino. Faie niala ta Atena tao ty Paoly, naho fa nisy Jiosy boake a Tesalonika agne nampikorontagne. Nijanogne ta Beria tao ty Timoty naho i Silasy, mba hampahery ty rahalahy tao. Niatreke fagnenjehagne mafe ty rahalahy ta Tesalonika agne tamy izay, le nampiherégne i Paoly mbeo ty Timoty mba  hampahery iareo. Nalefa i Paoly hitilike fiangonagne maro naho hampahery iareo ty Timoty tafara izay.

Hoe ty Paoly tamy i Timoty: ‘Tsy maintsy henjehegne ze te hanompo i Jehovah.’ Le izay ty nanjò i Timoty. Faie fale reke, satria nagnaporofo fa tsy nivalike tamy i Jehovah.

Hoe ty Paoly tamo o Filipianao: ‘Halefako ama’areo agne ty Timoty. I reke ty hampianatse anareo ty fomba handehanagne amy ty hamarenagne sady hampiofagne anareo hitory.’ Natokisa i Paoly ty Timoty. Mpinamagne iareo sady an-tao’e maro ty niharoa iareo tamy ty fanompoagne.