Timɔte aki ɔnangɛso la dikɛnda laki l’etshumanelo ka la Lustɛra. Papa kande aki ose Ngirika ndo mama kande aki ose Juda. Eyunikɛ wa mama kande ndo tshɛnde Lɔyisɛ, waketshaka Timɔte akambo wendana la Jehowa lam’akinde eke dikɛnda.

Lam’akembola Pɔɔlɔ Lustɛra lo lɔkɛndɔ lande la hende l’esambishelo, nde akɛnyi dia Timɔte akokaka mɛtɛ anango ngandji ndo akalomɔlomɔka dia mbakimanyiya. Pɔɔlɔ akelɛ Timɔte dia nde mbotshindɛ lo lɔkɛndɔ lande. L’edjedja ka wonya, Pɔɔlɔ akalowanya Timɔte dia nde monga osambisha ndo ombetsha w’oshika wa lokumu l’ɔlɔlɔ.

Nyuma k’ekila kakalɔmbɔla Pɔɔlɔ la Timɔte lɛnɛ tshɛ akawatatshɔka. L’otsho ɔmɔtshi, lo ɛnɛlɔ, onto ɔmɔtshi akatɛka Pɔɔlɔ dia nde ndja la Makɛdɔniya dia ndjaakimanyiya. Ko Pɔɔlɔ, Timɔte, Silasɛ ndo Luka wakatshu lɛkɔ dia tosambisha ndo tokenga tshumanelo.

Lo osomba w’ase Makɛdɔniya wa Tɛsalɔnika, apami la wamato efula wakakome Akristo. Koko ase Juda amɔtshi wakoke Pɔɔlɔ la asekande kandjema. Vɔ wakatshumanya olui w’anto ndo wakande anangɛso asɔ ko wakaatɔlɛ le ɛnɔmbɔdi w’osomba, watahangɔhangɔ vate: ‘Apami anɛ wekɔ atunyi wa lowandji l’ase Rɔmɔ!’ Lɔsɛnɔ la Pɔɔlɔ la Timɔte laki lo waale, ɔnkɔnɛ vɔ wakalawɔ otsha la Bɛrɔya l’otsho.

Ase Bɛrɔya wakalomɔlomɔka dia mbeka lokumu l’ɔlɔlɔ ko ase Ngirika la ase Juda waki lɛkɔ wakakome ambetawudi. Koko etena kakaye ase Juda amɔtshi oma la Tɛsalɔnika ndo kakawadje lofunge, Pɔɔlɔ akatshu otsha l’Atɛna. Timɔte la Silasɛ wakatshikala la Bɛrɔya dia nkeketsha anangɛwɔ. L’etena kɛmɔtshi, Pɔɔlɔ akatome Timɔte otsha la Tɛsalɔnika dia  tokimanyiya anangɛwɔ wakadiɛnɛka la ɛhɛnyɔhɛnyɔ wa wolo lɛkɔ. L’ɔkɔngɔ diko, Pɔɔlɔ akayotoma Timɔte dia tembola tshumanelo dikina efula ndo todikeketsha.

Pɔɔlɔ akatɛ Timɔte ate: ‘Wanɛ walanga kambɛ Jehowa, wayɔhɛnyahɛnyama.’ Timɔte akahɛnyahɛnyama ndo akadjama lo lokanu l’ɔtɛ wa mbetawɔ kande. Nde aki l’ɔngɛnɔngɛnɔ lo diaaso diaki la nde sɔ dia mɛnya kɔlamelo yande le Jehowa.

Pɔɔlɔ akatɛ ase Filipɛ ate: ‘Dimi lambotoma Timɔte le nyu. Nde ayonyetsha kɛnɛ kalembetshiya nkɛndakɛnda lo mɛtɛ ndo nde ayonyolowanya l’olimu w’esambishelo.’ Pɔɔlɔ akeyaka dia nde akakokaka ndjaɛkɛ le Timɔte. Vɔ wakakambe kaamɛ oko angɛnyi ndo ekambi l’edja k’ɛnɔnyi efula.