Ko Tīmoté ko ha tokoua kei siʻi ia ʻi he fakatahaʻanga ʻi Līsitá. Ko ʻene tamaí ko ha Kalisi, pea ko ʻene faʻeé ko ha Siu. Ko ʻene faʻeé ko ʻIunisi, mo ʻene kui fefiné ko Loisi naʻá na akoʻi ʻa Tīmote fekauʻaki mo Sihova mei heʻene kei siʻí.

ʻI he ʻaʻahi ʻa Paula ki Līsita lolotonga ʻene fononga fakamalanga hono uá, naʻá ne ʻiloʻi ai naʻe ʻofa moʻoni ʻa Tīmote ʻi he fanga tokouá pea naʻá ne loto-lelei ke tokoniʻi kinautolu. Naʻe fakaafeʻi ʻe Paula ʻa Tīmote ke na ō ʻi heʻene fonongá. ʻI he faai atu ʻa e taimí, naʻe akoʻi ʻe Paula ʻa Tīmote ke ne hoko ko ha tokotaha malanga lelei mo e faiako ʻo e ongoongo leleí.

Naʻe tataki ʻe he laumālie māʻoniʻoní ʻa Paula mo Tīmote ʻi ha feituʻu pē naʻá na ō ki ai. ʻI he pō ʻe taha, naʻe tala ange ai ʻe ha tangata kia Paula ʻi ha vīsone ke ne ʻalu ange ki Masitōnia ʻo tokoniʻi kinautolu. Ko ia naʻe ʻalu ki ai ʻa Paula, Tīmote, Sailosi, pea mo Luke ʻo malanga mo fokotuʻu ai ha ngaahi fakatahaʻanga.

ʻI he kolo Masitōnia ko Tesalonaiká, naʻe hoko ai ʻa e kakai tangata mo e kakai fefine tokolahi ko e kau Kalisitiane. Ka naʻe meheka ʻa e niʻihi ʻo e kau Siú kia Paula mo hono ngaahi kaungāmeʻá. Naʻa nau fakaʻaiʻai ha fuʻu kakai ke nau toho ʻa e fanga tokouá ki he kau pule koló, mo nau kaila: ‘Ko e kau tangatá ni ko e ngaahi fili kinautolu ʻo e puleʻanga Lomá!’ Naʻe ʻi he tuʻunga fakatuʻutāmaki ʻa e moʻui ʻa Paula mo Tīmoté, ko ia naʻá na hola ai ʻi he poʻulí ki Pēlea.

Naʻe loto-lelei ʻa e kakai ʻo Pēleá ke nau ʻiloʻi ʻa e ongoongo leleí, pea naʻe hoko ai ko e kau tui ha kau Kalisi mo ha kau Siu. Ka ʻi he haʻu ha kau Siu ʻe niʻihi mei Tesalonaika ʻo fakatupu ha palopalemá, naʻe mavahe ʻa Paula ʻo ʻalu ki ʻAtenisi. Naʻe nofo pē ʻa Tīmote mo Sailosi ʻi Pēlea ʻo fakaivimālohiʻi ʻa e fanga tokouá. ʻI ha taimi, naʻe fakafoki ʻe Paula ʻa Tīmote ki Tesalonaika ke ne tokoniʻi ʻa e fanga tokouá ke nau lava ʻo kātakiʻi ʻa e fakatanga lahi ʻi aí. Ki mui ai, naʻe fekauʻi atu ai ʻe Paula ʻa  Tīmote ke ne ʻaʻahi ki he ngaahi fakatahaʻanga lahi kehe ʻo fakalototoʻaʻi kinautolu.

Naʻe tala ʻe Paula kia Tīmote: ‘Ko e faʻahinga ʻoku nau loto ke tauhi kia Sihová ʻe fakatangaʻi kinautolu.’ Naʻe fakatangaʻi mo tuku pilīsone ʻa Tīmote koeʻuhi ko ʻene tuí. Naʻá ne fiefia he ko e faingamālie ia ke ne fakamoʻoniʻi ai ʻene mateaki kia Sihová.

Naʻe tala ʻe Paula ki he kau Filipaí: ‘ʻOku ou fekauʻi atu ʻa Tīmote. Te ne akoʻi kimoutolu ki he founga ke ʻaʻeva ai ʻi he moʻoní, pea te ne akoʻi kimoutolu ʻi he ngāue fakafaifekaú.’ Naʻe ʻiloʻi ʻe Paula ʻe lava ke ne falala kia Tīmote. Naʻá na ngāue fakataha ko e ongo kaumeʻa mo e kaungā-sevāniti ʻi he ngaahi taʻu lahi.