Mumpingu wa ku Lustra mwenga munyamata zina laki Timote. Awisi ŵenga Agiriki ndipu anyina ŵenga Ayuda. Anyina a Enike ndi ambuyaki a Loisi, angumusambiza zaku Yehova kwambiya pa unamana waki.

Pa nyengu yo Paulo wanguluta ku Lustra, pa ulendu waki wachiŵi wakupharazga, wanguwona kuti Timote wayanjanga abali ndipu wenga wakunozgeka kuŵawovya. Paulo wangupempha Timote kuti wayendi nayu limoza pa ulendu waki. Pati pajumpha nyengu, Paulo wangusambiza Timote kupharazga ndi kusambiza umampha.

Paulo ndi Timote alongozgekanga ndi mzimu utuŵa kwekosi ko alutanga. Zuŵa linyaki usiku, mu chiwona, munthu munyaki wangukambiya Paulo kuti waluti ku Makedonia kuti wakaŵawovyi. Mwaviyo, Paulo, Timote, Sila ndi Luka anguluta kweniko kuchipharazga ndipu angujalikiska mipingu.

Anthurumi ndi anthukazi anandi anguja Akhristu mutawuni ya Makedonia ku Tesalonika. Kweni Ayuda anyaki achitiyanga sanji Paulo ndi ŵanthu wo wapharazganga nawu. Yiwu angudana ŵanthu anandi ndipu anguguguziya abali wo kwa alongozgi a tawuni yo ndipu adanilizanga kuti: ‘Ŵanthu yaŵa atinkhana ndi boma la Aroma!’ Paulo ndi Timote anguthaŵiya ku Berea ndi usiku chifukwa umoyu wawu wenga pangozi.

Ŵanthu a ku Berea akhumbisisanga kusambira uthenga wamampha. Mwaviyo, Agiriki ndi Ayuda ku Berea anguja Akhristu. Kweni kwati kwaza Ayuda anyaki kutuliya ku Tesalonika, angwambisa masuzgu ivi vinguchitisa kuti Paulo wathaŵiyi ku Athene. Timote ndi Sila angujaliya ku Berea kuti achiski abali. Pavuli paki, Paulo wangukambiya Timote kuti wawere ku Tesalonika, wakawovyi abali kukunthiyapu chifukwa chakuti atombozgekanga ukongwa. Pati pajumpha nyengu, Paulo wangutuma Timote kuti wakachiski abali ndi azichi mumipingu yinyaki.

Paulo wangukambiya Timote kuti: ‘Wo akhumba kuteŵete Yehova azamutombozgeka.’ Timote wangutombozgeka ndipu wanguŵikika mujeri chifukwa cha chivwanu chaki. Wangukondwa chifukwa wangulongo kuti wenga wakugomezeka kwaku Yehova.

Paulo wangukambiya abali a ku Filipi kuti: ‘Ndikutumiziyeningi Timote. Iyu wakusambizeningi kuti muchitengi vinthu nge muteŵeti waku Yehova ndipuso mo mungapharazgiya.’ Paulo waziŵanga kuti Timote wenga wakugomezgeka. Yiwu anguteŵete limoza kwa vyaka vinandi ndipu ayanjananga ukongwa.