CIIYO 100
Paulo Alimwi a Timoteyo
Timoteyo wakali mukwesu uucili mwana-mwana mumbungano yaku Lustro. Bausyi bakali ba Giriki mpoonya banyina bakali ba Juda. Banyina, nkokuti ba Yunisi, alimwi abakaapanyina ba Loisi bakamuyiisya Timoteyo kujatikizya Jehova kuzwa kubwana.
Ciindi Paulo naakaswaide ku Lustro mulweendo lwakwe lwabili lwakukambauka, wakabona kuti Timoteyo wakali kubayanda kapati bakwesu alimwi wakali kuyandisisya kubagwasya. Paulo wakaambila Timoteyo kuti amusangane mulweendo lwakwe. Mukuya kwaciindi, Paulo wakamuyiisya Timoteyo kuba mukambausi amwiiyi mubotu wamakani mabotu.
Muuya uusalala wakamusololela Paulo alimwi a Timoteyo kufwumbwa nkobakaunka. Bumwi busiku mucilengaano, mwaalumi umwi wakaambila Paulo kuti aunke ku Makedoniya kuyoobagwasya. Aboobo Paulo, Timoteyo, Sila, alimwi a Luka bakaunka ookuya kuyookambauka akutalisya mbungano.
Mumunzi umwi wamu Makedoniya mu Tesalonika, baalumi banji abamakaintu bakaba Banakristo. Pele ba Juda bamwi bakamufwida munyono Paulo abeenzinyina. Aboobo bakapanga nkamu yabasimanyongwe akukwela bakwesu kubatola kubeendelezi bamunzi kabayaaboongolola kuti: ‘Baalumi aaba mbaasinkondonyina amfwulumende yabana Roma!’ Buumi bwa Paulo abwa Timoteyo bwakaba muntenda, aboobo bakatijila ku Bereya ciindi camasiku.
Bantu baku Bereya bakali kuyandisisya kwiiya makani mabotu, ba Giriki alimwi aba Juda bakaba basyomi. Pele ciindi ba Juda bamwi nobakaboola kuzwa ku Tesalonika akutalisya manyongwe, Paulo wakaunka ku Atene. Timoteyo alimwi a Sila bakakkala ku Bereya kutegwa bayumye-yumye bakwesu. Mukuya kwaciindi, Paulo wakatuma Timoteyo kuti apiluke ku Tesalonika kutegwa akagwasye bakwesu kuliyumya kukupenzyegwa kupati ikwakaliko ooko. Nokwakainda ciindi, Paulo wakatuma Timoteyo kuti akaswaye mbungano zimbi akuyumya-yumya bakwesu.
Paulo wakaambila Timoteyo kuti: ‘Aabo ibayanda kubelekela Jehova bayoopenzyegwa.’ Timoteyo wakapenzyegwa akwaangwa akaambo kalusyomo lwakwe. Wakalikkomene akaambo kacoolwe ncaakajisi icakutondezya kusyomeka kwakwe kuli Jehova.
Paulo wakaambila bana Filipo kuti: ‘Ndamutumina Timoteyo. Uyoomuyiisya ncocaamba kweenda mukasimpe, alimwi uyoomuyiisya mulimo wakukambauka.’ Paulo wakali kumusyoma Timoteyo. Bakabeleka antoomwe kabali balongwe alimwi kabali babelesinyina kwamyaka minji.
“Taakwe uumbi ngondikonzya kutuma uujisi moyo uuli mbuli wakwe uuyoozilanganya bweelede zintu zijatikizya ndinywe. Nkaambo aaba bamwi boonse bayandaula zintu zyakuligwasya lwabo beni, ikutali zijatikizya Jesu Kristo pe.”—Bafilipi 2:20, 21
Andiza Inga Mwaakkomanina Ayaaya
AMUBAYIISYE BANA BANU
Timoteo Wakali Kuyanda Kugwasya Bantu
Mbuti mbokonzya kuba abuumi bukkomanisya, mbuli bwa Timoteo?
NGAZI YAMULINDIZI
“Mwanaangu Uuyandwa Alimwi Uusyomeka mu Mwami”
Ino ncinzi cakagwasya Timoteyo kumana nsoni akuba mulangizi Munakristo uulibedelede?
