Ja Timoteo waj jun jmoj-aljeltik kerem ja bʼa kongregasyon bʼa Listra. Ja stati kʼotel griego, jaxa snani judía. Ja snani sbʼiʼil Eunice, jaxa smexepi, Loida. Ja yeʼnle sjeʼaweyi ja Timoteo sbʼaja Jyoba man yal xchʼinil.

Yajni ja Pablo yulatay ja Listra ja bʼa xchabʼil sbʼejyel bʼa xcholjel, ja yeʼn snaʼa ja Timoteo wani syajtay meran ja smoj-aljeliki sok tolabida wa skʼana oj skoltay. Ja yuj, ja Pablo sloko ja Timoteo bʼa oj waj mojtajuk ja bʼa sbʼejyeli. Ekʼ ja tyempo, ja Pablo xchapa ja Timoteo bʼa oj kʼotuk jun lekil jeʼuman sok choluman sbʼaja lekil rason bʼa Dyos.

Ja yip ja Dyos toji ja Pablo soka Timoteo chikan bʼa wa xwajye ekʼ. Jun akwal, ja Pablo yila jun nakʼsat. Yila jun winik bʼa aljiyabʼ awajuk koltanel bʼa Macedonia. Ja yuj ja Pablo, ja Timoteo, ja Silas soka Lucas wajye ja tiw bʼa xcholjel sok bʼa yajel eluk kongregasyonik.

Ja bʼa chonabʼ Macedonia bʼa Tesalónica, jitsan winik sok ixuke ochye nebʼuman. Pe jujuntik judío jel koraja yilawe ja Pablo soka smojiki. Stsomowe jun nole ixuk winik sok kichjiye man bʼay ja matik ay xchol ja bʼa chonabʼi. Ja judíoʼik awaniye yaljel: «¡Ja winike it wa skontraʼane ja gobyerno bʼa Roma!». Ja sakʼanile ja Pablo soka Timoteo xiwela sbʼaj ajyi, ja yuj akwal spakawe ajnel man Berea.

Ja swinkil bʼa Berea wani skʼanawe yabʼjel ja lekil rason bʼa Dyosi, sok jitsan griego sok judíoʼik skʼuʼane. Pe jujuntik judíoʼik bʼa Tesalónica waj snik-e kʼumal, jaxa Pablo tixa waj bʼa Atenas. Ja Timoteo soka Silas ti kanye bʼa Berea bʼa stsatsankʼujolajel ja smoj-aljeliki. Ekʼ ja tyempo, ja Pablo sjeka bʼa pilan ekʼele ja Timoteo bʼa Tesalónica bʼa wajel skoltajel ja smoj-aljelik bʼa kuchelyujile ja tsatsal wokol wan ajyel ja tiw. Tsaʼan,  ja Pablo sjeka ja Timoteo bʼa yulatajel sok bʼa stsatsankʼujolajel jitsan kongregasyonik.

Ja Pablo yalyabʼ ja Timoteo: «Ja matik wa skʼanawe oj yaʼteltaye ja Jyoba ojni ijuk spatike». Ja Timoteo iji spatik sok lutji preso yuja skʼuʼajeli. Pe ja yeʼn gusto ajyi yujni jach sjeʼa toj ay soka Jyoba.

Ja Pablo yalyabʼ ja swinkil ja Filipos: «Oj jekawilex ja Timoteo. Ja yeʼn oj sjeʼawilex jastal ajyel ja bʼa smeranili sok jastal xcholjel». Ja Pablo sjipani skʼujol bʼa Timoteo. Aʼtijiye jitsan jabʼil lajan sok yamigoʼan sbʼaje.