LESEN 100
Pol na Timoti
Timoti em wanpela yangpela brata long kongrigesen long Listra. Papa bilong em i bilong Grik, na mama em meri Juda. Mama bilong Timoti, Yunis, na bubu meri, Lois, i skulim em long Jehova kirap long taim em i liklik yet.
Taim Pol i visitim Listra long namba 2 raun bilong em long autim tok, em i luksave olsem Timoti i laikim tru ol brata na i redi long helpim ol. Pol i singautim Timoti long go wantaim em long dispela raun. Insait long dispela haptaim, Pol i trenim Timoti long autim gut tok na skulim ol man long gutnius.
Long olgeta hap Pol na Timoti i go, holi spirit i stiaim ol. Wanpela nait, long visen, wanpela man i tokim Pol long kam long Masedonia na helpim ol. So Pol, Timoti, Sailas, na Luk, i go autim tok long dispela hap na kirapim ol kongrigesen.
Long taun Tesalonaika bilong Masedonia, planti man na meri i kamap Kristen. Tasol sampela Juda i jeles long Pol na ol wanwok bilong em. Ol i bungim bikpela lain na pulim ol brata i go long ol hetman bilong taun, ol i singaut: ‘Ol dispela man i birua long gavman Rom!’ Pol na Timoti inap dai, olsem na long nait ol i ranawe i go long Beria.
Ol manmeri long Beria i laik tru long kisim save long gutnius, na ol Grik na Juda wantaim i kamap ol bilipman. Tasol taim sampela Juda i lusim Tesalonaika na kam, ol i kirapim hevi, so Pol i lusim Beria na go long Atens. Timoti na Sailas i stap long Beria bilong strongim ol brata. Sampela taim bihain, Pol i salim Timoti i go bek long Tesalonaika long helpim ol brata long karim hevi bilong ol man i mekim nogut tru long ol. Bihain, Pol i salim Timoti i go lukim planti narapela kongrigesen na strongim ol.
Pol i tokim Timoti: ‘Ol man husat i laik mekim wok bilong Jehova, ol man bai mekim nogut long ol.’ Ol man i bin mekim nogut long Timoti na putim em long kalabus bikos long bilip bilong em. Em i amamas, long wanem, dispela i opim rot long em i kamapim pasin bilong em long stap gut long Jehova.
Pol i tokim ol Filipai: ‘Mi salim Timoti i kam long yupela. Em bai skulim yupela long wokabaut long tok i tru, na trenim yupela long wok bilong skulim ol man.’ Pol i save olsem em inap trastim Timoti. Inap planti yia, ol i bin wok wantaim olsem ol pren na ol wanwok.
“Mi no gat narapela man i gat wankain pasin olsem em, bai em i tingim tru yupela. Olgeta arapela i tingim laik bilong ol yet na ol i no tingim laik bilong Jisas Krais.”—Filipai 2:20, 21