.Timoseo akaba ali w’oruganda muto omu kitebe kya Rusitura Ise akaba ali Muyonani. Kuruga omu buto, nyina ou bayetaga Unike, hamu na nyinenkuru ou bayetaga Loi bakamwegesa ebintu ebirukukwata hali Yahwe.

Omukwenda Paulo obuyabungiire Rusitura ha rugendo rwe orwakabiri orw’okutebeza, akarora ngu Timoseo akaba n’agonza muno ab’oruganda kandi akaba n’agonza kubakonyera. Paulo akasaba Timoseo kumweteranizaho ha rugendo rwe. Paulo akamara obwire n’atendeka Timoseo kufooka mwegesa murungi ow’amakuru amarungi.

Omwoyo ogurukwera gukebembera Paulo na Timoseo hona nambere bagendaga. Kiro kimu omu obwire bw’ekiro, Paulo akatunga okubonekerwa nambere yarozere omusaija namweta kugenda Makedoni kubakonyera. Kinu kikaletera Paulo, Timoseo, Sira, hamu na Luka kugenda omu Makedoni kutebezayo n’okutandikayo ebitebe.

Haroho abasaija n’abakazi baingi mu rubuga rwa Sesalonika orukaba ruli omu kicweka kya Makedoni abafokere Bakristaayo. Baitu Abayudaaya abamu bakakwatirwa Paulo n’abagenzi be ihali. Bakasorooza abantu baingi kandi bakurra ab’oruganda babatwara omu balemi b’orubuga. Bakaba nibatoka nibagamba ngu: ‘Abasaija banu banyanzigwa ba gavumenti ya Roma!’ Obwomeezi bwa Paulo na Timoseo bukaba buli omu kabi, nahabweki omu obwire bw’ekiro bakairuka bagenda omu Beroya.

Abantu ab’omu Beroya bakaba nibagonza kwega amananu, kandi Abayonaani n’Abayudaaya bakafooka baheereza ba Ruhanga. Baitu haroho Abayudaaya abamu abarugire Sesalonika bakaleta akaimukirro, nukwo Paulo kugenda omu Aseni. Timoseo na Sira bakasigara omu Beroya kugumya ab’oruganda. Obwire bukahika Paulo yatuma Timoseo kugarukayo omu Sesalonika kukonyera ab’oruganda kugumira  okuhiganizibwa kw’amaani oku bakaba nibarabamu. Hanyuma, Paulo akatuma Timoseo kugenda kubungira ebitebe bindi bingi nukwo agarremu ab’oruganda amaani.

Paulo akagambira Timoseo ati: ‘Boona abarukugonza kuhereza Yahwe nibaija kuhiganizibwa.’ Timoseo akahiganizibwa kandi yabohwa habw’okwikiriza kwe. Akasemererwa habwokuba kikamuha omugisa gw’okwoleka ngu mwesigwa hali Yahwe.

Paulo akagambira Abakristaayo ab’omu Firipi ati: ‘Nimbatumira Timoseo. Naija kubegesa omulingo gw’okugendera omu mananu, kandi naija kubatendeka omu buheereza.’ Paulo akaba nayesiga Timoseo. Bakaba bamazire emyaka nyingi nibakora hamu kandi bali banywani.