Тимофей дээр элээди оол Листрада чыышка бараалгап чораан. Ооң ачазы грек, а авазы еврей турган. Авазының адын Эвника, а кырган-авазын Лоида дээр. Тимофей чажындан тура Иегованың дугайында авазы биле кырган-авазындан дыңнап өскен.

Павел ийиги аян-чоруунуң үезинде Листрага келген. Тимофей акы-угбаларга дузалажырынга белен база оларга дыка ынак деп, ол эскерип каан. Ынчангаш Павел аңаа кады чоруурун сүмелээн. Павел Тимофейни эки өөреткениниң ачызында ол тулган башкы база суртаалчы апарган.

Оларның кайнаар баарын ыдыктыг сүлде удуртуп турган. Бир дүне Павел көстүүшкүн көрген: бир кижи ону Македонияда чурттап турар улуска дузалажыр кылдыр дилээн. Ынчангаш Павел, Сила, Лука база Тимофей ол черге суртаалдап, чыыштар тургузар дээш чорупкан.

Македонияда Фессалоника деп хоорайда хөй эр-херээжен улус христианнар апарган. Ынчалза-даа чамдык иудейлер адааргаш, көвей улусту чыып алгаш, Павелди болгаш ооң-биле кады чораан улусту хоорайның чагырыкчыларынче аппарган. «Бо улус Рим чагырганың дайзыннары-дыр!» — деп, олар алгыржып турган. Павел биле Тимофейниң амы-тынынга айыыл тургустунуп кээрге, дүне када Верияже дезер ужурга таварышкан.

Верияның грек, еврей чурттакчылары өөрүшкүлүг медээге таарзынгаш, христианнар апарган. Ынчалза-даа Фессалоникадан чамдык иудейлер чедип келгеш, хөлзээзин үндүрүп эгелээрге, Павел Афиныже чорупкан. Тимофей биле Сила Верияда акы-угбаларның бүзүрелин быжыктырар дээш артып калган. Оон Павел Тимофейни катап Фессалоникаже, ында каржы истеп сүрүүшкүннерге таваржып турар акы-угбаларга дузалажыр кылдыр, чоргузупкан. Үе эрткенде,  Павел Тимофейни аңгы-аңгы чыыштарже акы-угбаларны деткиир кылдыр чоргузуп турган.

Павел Тимофейге: «Иегованың шупту бараалгакчыларын истеп сүрер» — деп чугаалаан. Тимофейни база бүзүрели дээш истеп сүрүп, кара-бажыңга олуртуп каан. Ол Иеговага бердингенин бадыткаар аргалыг болганынга өөрүп турган.

Павел филипчилерге: «Мен силерже Тимофейни чоргузуп тур мен. Ол силерни Иегованың бараалгакчызы болурунга база суртаалдаарынга өөредип каар» — дээн. Тимофейни шыдаар деп, Павел бүзүреп турган. Олар хөй чылдар ишти эки өңнүктер бооп, кады ажылдажып келген.