Timotheo o vha e miṅwahani ya vhuswa tshivhidzoni tsha ngei Lisitara. Khotsi awe vho vha vhe Mugerika nahone mme awe vhe Muyuda. Mme awe, Oinike na makhulu wawe Loisa vho funza Timotheo nga ha Yehova u bva a tshee mutukana.

Musi Paulo a tshi dalela Lisitara nga lwendo lwawe lwa u huwelela lwa vhuvhili, o ṱhogomela uri Timotheo u funa vhukuma vhahawe nahone o ḓiimisela u vha thusa. Paulo o ramba Timotheo uri a ṱuwe nae kha lwendo lwawe. Nga u ya ha tshifhinga, Paulo o gudisa Timotheo u vha muhuweleli na mugudisi wavhuḓi wa mafhungo maḓifha.

Paulo na Timotheo vho vha vha tshi livhiswa nga muya mukhethwa huṅwe na huṅwe he vha ya hone. Vhuṅwe vhusiku, Paulo o vhona bono ḽa munna we a mu vhudza uri a ḓe Makedonia u vha thusa. Nga zwenezwo, Paulo, Timotheo, Silasi na Luka vho mbo ḓi ya henefho u huwelela na u thoma zwivhidzo.

Muḓini wa Makedonia wa Thesalonika, vhanna na vhafumakadzi vhanzhi vho mbo ḓi vha Vhakriste. Fhedzi vhaṅwe Vhayuda vho vha na vivho kha Paulo na khonani dzawe. Vho kuvhanganya tshigwada tsha vhathu nahone vha isa vhenevho vhahashu ha vhavhusi, vha vhidzelela vha ri: ‘Havha vhathu ndi maswina a muvhuso wa Roma!’ Paulo na Timotheo vho vha vhe khomboni, nga zwenezwo, vha shavhela Berea vhusiku.

Vhathu vha Berea vho vha vho ḓiimisela u guda mafhungo maḓifha nahone Vhagerika na Vhayuda vho mbo ḓi vha vhatendi. Fhedzi musi hu tshi swika vhaṅwe Vhayuda vha bvaho Thesalonika nahone vha vusa khakhathi, Paulo o mbo ḓi ya Athene. Timotheo na Silasi vho sala Berea u itela u khwaṱhisa vhahashu. Nga u ya ha tshifhinga, Paulo o dovha a rumela Timotheo ngei Thesalonika uri a thuse vhahashu u konḓelela u tovholwa. Nga murahu, Paulo a rumela  Timotheo uri a dalele zwiṅwe zwivhidzo zwinzhi nahone a zwi ṱuṱuwedze.

Paulo o vhudza Timotheo a ri: ‘Vhane vha ṱoḓa u shumela Yehova vha ḓo tovholwa.’ Timotheo o tovholwa nahone a farwa nga nṱhani ha lutendo lwawe. O takalela tshibuli tsha u sumbedza Yehova uri u a fulufhedzea khae.

Paulo o vhudza Vhafilipi a ri: ‘Ndi khou ni rumela Timotheo. U ḓo ni funza uri u tshimbila ngohoni zwi amba mini nahone u ḓo ni gudisa vhuḓinḓani.’ Paulo o vha a tshi zwi ḓivha uri a nga fulufhela Timotheo. Vho shuma vhoṱhe vhe dzikhonani na vhashumisani miṅwaha minzhi.