Timoty io tanora tamy fiangonan̈a ta Lystra. Babany Timoty olo griky, fa reniny fo Jiosy, Eonika an̈arany. Loisa an̈arany dadiny. Reniny ndreky dadiny io nampianatra izy raha momba Jehovah, rango izy mbala hely.

Tamy dia faharoe nataony Paoly ta Lystra, hitany fa Timoty ten̈a tia iro rahalahy aby io ndreky tihan̈ampy iro mare. Nindesiny Paoly niaraka taminany Timoty. Paoly nampianatra Timoty fo, ke nanjary nahay nitory ndreky nampianatra vaovao tsara izy.

Fan̈ahy masin̈y Zan̈ahary nitariky Paoly ndreky Timoty tamy dia jiaby nataondro. Tandraraiky, alin̈y andra, Paoly nahita lelahy araiky tamy fahitan̈a, nikaiky izy handeha a Makedonia, han̈ampy iro tan̈y. Nandeha nitory tan̈y Paoly, Timoty, Silasy ndreky olo hafa koa, ke iro nan̈orin̈y fiangonan̈a maro tan̈y.

Naro lelahy ndreky man̈angy nanjary Kristianin̈y tamy tanànany Makedonia, ta Tesalonika tan̈y. Jiosy sasany ndraiky nafana fô ry Paoly. Iro namoron̈o vandy, ke nindesindro tamy sefony tanàna io Paoly. Ho iro: ‘Lelahy aby ty panohitry fanjakan̈a romanin̈y!’ Tseky nivonendro Paoly ndreky Timoty, ke alin̈izin̈y fo iro efa nilefa ta Beria.

Olo ta Beria tan̈y ten̈a tia nianatra raha momba vaovao tsara, ke naro Griky ndreky Jiosy niova. Nisy Jiosy baka ta Tesalonika nikorontan̈a iro, ke Paoly nilefa ta Atena. Timoty ndreky Silasy nidoko ta Beria fo nankahery iro rahalahy tan̈y. Nisy lera Paoly nan̈iraka Timoty nimpody ta Tesalonika han̈ampy iro tamy fiangonan̈a tan̈y, fotony iro nampijalin̈y mare. Timoty baka tio nirahiny nitsidiky fiangonan̈a tantany hafa koa, hankahery iro.

 Paoly nivolan̈a tamy Timoty: ‘Hampijalin̈y lan̈iany olo tihanompo Jehovah.’ Nampijalinolo Timoty ndreky nigadraindro baka tamy raha ninoany. Izy ravoravo fo, fotony izy nahavita tsy nivadiky tamy Jehovah.

Ho Paoly tamy Filipianin̈y aby io: ‘Hirahiko aminaro an̈y Timoty, hampianatra anaro dikany mandeha amy fahamarin̈ana zen̈y, baka io han̈ampy anaro hankatsara fanompoan̈a.’ Paoly natoky Timoty, fotony efa ela iro niaraka niasa, sady iro koa kamarady mare.