Timoteoeʼ juntúul táankelem xiʼipal yaan kaʼach tu múuchʼulil Listra. U papaeʼ griego yéetel u maamaeʼ judía. U maamaeʼ ku kʼaabaʼtik Eunice, u abuelaeʼ, Loida. Letiʼobeʼ tu kaʼansoʼob Timoteo desde tu chichnil u yaabilt Jéeoba.

Ka viajarnaj Pablo tu kaʼatéen utiaʼal u kʼaʼaytajeʼ, kʼuch tu kaajil Listra, teʼeloʼ tu yilaj Timoteoeʼ jach u yaabiltmaj le sukuʼunoʼoboʼ yéetel u kʼáat u yáantoʼob. Le oʼolal Pabloeʼ tu yaʼalaj tiʼ Timoteo ka xiʼik kʼaʼaytaj tu yéetel. Ka máan kʼiineʼ Pabloeʼ tu yáantaj Timoteo utiaʼal ka kaʼansajnak maʼalob yéetel utiaʼal ka u kʼaʼayt le jatsʼuts baʼaxoʼob ken u beet Diosoʼ.

Le kiliʼich muukʼ nuʼuktik kaʼach Pablo yéetel Timoteo jeʼel tuʼuxak ka xiʼikoʼobeʼ. Junpʼéel áakʼabeʼ anchaj junpʼéel náay tiʼ Pablo, tuʼux tu yilaj juntúul máak táan u yaʼaliktiʼ ka xiʼik Macedonia u yáantoʼob. Le oʼolal Pablo, Timoteo, Silas yéetel Lucaseʼ binoʼob kʼaʼaytaj teʼeloʼ utiaʼal u káajsikoʼob túumben múuchʼuliloʼob.

Tu kaajil Tesalónicaeʼ yaʼab xiiboʼob yéetel koʼoleloʼob tu beetubaʼob disipuloʼob tiʼ Jesús. Chéen baʼaleʼ jujuntúul judíoʼobeʼ u pʼekmoʼob kaʼach Pablo bey xan le máaxoʼob láakʼintikoʼ. Tu muchʼoʼob yaʼab kʼasaʼan máakoʼobeʼ ka tu bisoʼob le sukuʼunoʼob tu táan u gobernanteiloʼob le kaajoʼ. Le judíoʼoboʼ tu yawtoʼob: ‹¡Le máakoʼobaʼ táan u binoʼob tu contra u gobiernoil Roma!›. Le oʼolal Pablo yéetel Timoteoeʼ anchaj u binoʼob Berea de áakʼab tumen taak kaʼach u kíimsaʼaloʼob.

U kajnáaliloʼob Bereaeʼ u kʼáat kaʼach u yuʼuboʼob le jatsʼuts baʼaxoʼob ken u beet Diosoʼ, yaʼab griegoʼob yéetel judíoʼobeʼ anchaj u fejoʼob. Chéen baʼaleʼ jujuntúul judíoʼob tesalonicailoʼobeʼ bin u xuʼulsoʼob u kʼaʼaytaj Pablo, le oʼolal bin Atenas. Timoteo yéetel Silaseʼ pʼáatoʼob Berea utiaʼal u muʼukʼaʼankúuntik u fe le sukuʼunoʼoboʼ. Ka máan kʼiineʼ Pabloeʼ tu  kaʼa túuxtaj Timoteo tu kaajil Tesalónica utiaʼal u líiʼsik u yóoloʼob le táan u sen chʼaʼpachtaʼaloʼoboʼ. Ka tsʼoʼokeʼ Pabloeʼ tu túuxtaj Timoteo u xíimbalt uláakʼ múuchʼuliloʼob utiaʼal u líiʼsik u yóoloʼob.

Pabloeʼ tu yaʼalaj tiʼ Timoteo: ‹Le máaxoʼob u kʼáatoʼob u meyajtoʼob Dioseʼ, yaan xan u chʼaʼpachtaʼaloʼob›. Timoteoeʼ chʼaʼpachtaʼabi yéetel oksaʼab xan cárcel ikil u meyajtik Dios. Chéen baʼaleʼ letiʼeʼ kiʼimak u yóol kaʼachi tumen beyoʼ táan u yeʼesik chúukaʼan u yóol tiʼ Jéeoba.

Pabloeʼ tu yaʼalaj tiʼ le filiposiloʼoboʼ: ‹Yaan in túuxtik Timoteo ta wiknaleʼex. Letiʼ kun kaʼansikteʼex bix unaj u kuxtal juntúul máax ku meyajtik Jéeoba yéetel bix unaj a kʼaʼaytajeʼex›. Pabloeʼ ku confiar kaʼach tiʼ Timoteo. Tu múul meyajtoʼob Dios yéetel jach maʼalob tu bisilubaʼob.