Timoteo angia paranga wirina rogo gu dungurati naadu Rusetura yo. Bako angia Giriki nako kingia Yudo. Na Timoteo nangia Eunike na titako nangia Roi ayugupai fuko tipa Yekova ho ko adu ni kindi ni tooni ko.

Ho Pauro andu ni ku Rusetura yo ti regbo gako ue nunguro nga ga tungusapai, ko abi gupai nga Timoteo akpinyemu awirina ni bakerehe na ko nga regerege ka undoyo. Pauro ayambu Timoteo i ndu gi nunguro re na ko. Wa regbo aasusa, Pauro araba Timoteo ko du ni wene batungusipai na ni wene bayugu wene pangbanga.

Ziazia toro angbembatayo fu aPauro na Timoteo rogo agu aba i and ku rogoho. Rogo kura yuru sa, kura kumba sa aya fu Pauro rogo yuguyugupai wẽ, ko ndu ku Masedonia yo tipa ka undo yo. Sidu, Pauro, Timoteo, Sira, gbiati Ruka andu koyo tipa ka tungusapai yo na ka sigira dungurati yo.

Rogo gu ga aboro Masedonia gbata nga Tesaronike, badungu akumba na adee ada ni aKristano yo. Ono bete kura aYudo anaakpi aPauro akpi na gako abadiasunge. I asa rimbasa aboro zuu i zi awirina ngbaome ki ndu na yo koyo abazogo adu ni, ni poi kuari nga: ‘Agi akumba re nga avura gu zogarago nga ga aRomo!’ Ga Pauro raka na ga Timoteo adu ngbapai yo, sidu, i aoro ku Beroya yo yuru.

Agu aboro naadu Beroya yo adu regerege tipa ka wirika wene pangbanga, agu aGiriki na aYudo naadu yo ada ni aidipase. Ono ho kura aYudo aye ni Tesaronike yo ki gbarasi apai yo, Pauro aguari ki ndu ku Atenai yo. Timoteo na Sira anye kina Beroya yo tipa ka nyakasa awirina. Kusa, Pauro akedi Timoteo berewe ku Tesaronike yo ko ndu ka undo awirina i sovura kuti gu kere rungosiro i  aagbiatiyo na ni. Kusa berewe, Pauro akedi Timoteo ko ndu ka bi dungu adungurati na kini ngarasi agu awirina du rogoho.

Pauro aya fu Timoteo wẽ: ‘Agu aboro nakpinyemu ka iriso Mbori, i nika rungosi yo arungosi.’ I aima rungosi Timoteo na ki ba ko ku bambukiso yo tipa gako idapase. Ko adu na ngbarago tipa gu momu nga ka yugo gako padu ni ruruse fu Yekova.

Pauro aya fu agu aboro naadu Firipoi yo wẽ: ‘Mi nakeda Timoteo koyo du oni ni. Ko nika yugo rogo gupai yo furoni nga ka ta rogo rengo yo, na ko nika raba roni wai ka tungusapai.’ Pauro aima ino gupai nga ko ima rengba ka kido kuti Timoteo. I amangisunge ni abakure na ni abadiasunge tipa dungu agarã.